Mipui nawrna avangin Bulgarian sorkar bâng

Mipui nawrna avangin Bulgarian sorkar bâng
Bulgaria-a Prime Minister Rosen Zhelyazkov-a kaihhruai sorkar chu an khawpui lian hrang hrangah mipuiin lungawi lohna an lantir hnu leh Nilaini zana an khawpui ber, Sofia lailia an pun khawm hnuah an bâng.
Zhelyazkov-a hi parliament-a a sorkar rintawk lohna put luh buk a nih hma lawk leh an ramin euro an zawm hma ni 20 lekah a bâng thut a ni.
Mipuite hian January thla atanga sorkar tan hi kawng hrang hrangah ei ru niin an puh a. Sorkar hian mipuite lungawi lo tihtawp a nih theih nan nakum budget an duan, sawisel hlawh tak chu a lo hnuk kir tawh nghe nghe.
“Khua leh tuiten sorkar laka an lungawi lohna au aw hi kan hria a ni,” tiin Zhelyazkov-a hian TV-a thuchah a sawiah a sawi.
“Thalai leh upa zawkte pawh kan bân nan an au chhuak,” a ti a. “Hetiang mipui tha tak tak hi thlawp tur a ni,” a ti a. Sorkar website chuan minister-te hian cabinet thar din a nih hma chu an hna ngai erawh an la thawk zui dawn tih a tar lang.
Nilaini zan khan Sofia-a Triangle of Power leh Independence Square-ah mi 50,000 atanga 1,00,000 inkar velin sorkar an bân nawr nan an pung khawm a. ‘Resignation’ tih leh ‘Mafia Out’ tih thute chu parliament building-ah projector hmanga kah chhuah a ni.
Kar hmasa khan President Rumen Radev-a pawhin sorkar chu bâng se tiin mipui duh dan hi a thlawp thu a lo sawi tawh.
Zhelyazkov-a sorkar hi rintawk lohna bukna vawi nga lai a lo paltlang tawh a, a vawi ruk nan Ningani khan buk leh hmabak a ni nghe nghe.
Lungawi lo tam tak hi sorkara mi langsar pahnih, Delyan Peevski leh prime minister hlui, Boyko Borissov chet danah an thinrim zual a, Nilaini zana hun hman pawh hi ‘Resignation! Peevski and Borissov Out of Power’ tih thupui hmanga neih a ni tih an rama BTA news agency chuan a tar lang.
Peevski-a hi US leh UK sorkarin ei rua puhna avanga a hrek lai niin a kaihhruai party hi sorkar din theihna bul a ni thung.
Borissov-a hi October, 2024 inthlana party mala chak ber, Zhelyazkov-a kaihhruai, Gerb party-a tel ve an ni a. Tangrual sorkar hian Nilainiah khan January 1 atanga Bulgaria-in eurozone a zawm thleng la kal an tum tih an lo sawi tawh nghe nghe.
Borissov-a hi ei ruk duh lova pungkhawmten kum 2020 khan a sorkar nam thluk a lo ni tawh a, a hnuah vawi sarih inthlan a awm tawh.
Sofia-a politic inlumlet nasa tak awm mek mah se Bulgaria-in euro a zawm tur erawh a danglam dawn lo nia sawi a ni.