Mipui nun tibuai zawnga bandh nei lo turin ngen

Mipui nun tibuai zawnga
bandh nei lo turin ngen
Forest (Conservation) Amendment Act 2023 duh loh leh adopt tawh sut tura MNF party-in November 29-a state huap total bandh neih an tum chu minister PC Vanlalruata chuan mipui nunphung tibuai zawnga nei lui lo turin a ngen tih a sawi.
Farmers’ Welfare minister PC Vanlalruata chuan, FCAA chu House-ah ngun takin member-ten an sawiho a, tha tiin House-in a pass tih a sawi.
“Ram hmasawn kan duh a, chutah chuan forest clearance hi kan mutan lian tak a ni. FCAA hi central-a sawrkar mek NDA siam a ni a, chutih laia NDA thawhpuitu MNF-in an lo do ve chiam mai hi a mawi ber lo a ni. Mipui tana harsatna thlen zawng leh mi eizawnna tibuai zawnga total bandh huaihawt an tum hi kalphung hlui zia a ni,” a ti.
Khawpui behchhan eizawnna nasa takin a nghawng dawn tih a sawi a. Sumdawnna hrang hrang – restaurant, transport, hotel, financial services, professional services, construction leh mining leh a dangte nasa takin a nghawng dawn tih a sawi.
“Mithiamte chhut danin, ni khat total bandh huaihawt hian cheng nuai 2000 chuang kan hloh dawn a, a uiawm em em a ni. Chuvangin, total bandh huaihawt tum mekte pawh inngaihtuah tha se, an duh lohna chu chanchinbu leh social media-ah an tarlang hnem tawk tawh a, mipui tana harsatna thlen zawng leh mi eizawnna nghawng zawnga sawrkar do hi ngaihtuah tha leh turin ka ngen a ni,” PC Vanlalruata hian a ti.