Mipui rawngbawltu tha ni tur chuan tanghma hai loh a pawimawh – CM

Mipui rawngbawltu tha ni tur chuan
tanghma hai loh a pawimawh – CM
Mipui rawngbawltu tha ni turin mahni tanghma ngai loh a pawimawh tih chief minister Zoramthanga chuan a sawi.
April 21 kha National Civil Services Day a ni a. Mizoramah pawh district tinah hman niin Aizawla hman chu chief minister hian a hmanpui. Sawrkar hnathawkte chu mipui rawngbawl hna an thawhna kawngah theihtawp chhuah zel turin a chah a. Mipui rawngbawltu tha ni tur chuan mahni hmasial loa midang thatna tur ngaihtuah leh dawhtheih a pawimawh ber, tiin, “Civil service chu mipui rawngbawlna a ni tih rilru ah pai rengin, mahni tanghma hai loa, mahni chunga thleng tura kan duh loh chu midang chunga tiloin, rinawm taka hna thawh a ngai,” a ti. Mizoramin hma a sawn zelna tura sawrkar hnathawkte mawhphurhna sawiin, state-in hmasawnna tur resource a neihte chu a nihna anga hman a nih theihna’n mahni hmazawn theuhah hmatlhir thui tak nei chunga thawh a pawimawh tih a sawi a ni.
He hun kaihruaitu chief secretary Dr Renu Sharma chuan Civil Services Day tobul leh pawimawhna a sawi a. Ram inrelbawlna khawlah mawhphurhna pawimawh tak chang an nih avangin an hnathawhah thleibik nei loin, mi laktlak leh rintlak ni chunga dan zahawmna vawnghima hna thawk zel turin a chah.
Sawrkar website tha lawmman – Government Website Excellence Awards 2022- 2023 sem a ni a, 1-na atanga 10-na thleng sem a ni. He award hi category pahnih – official department website leh official institutional website-ah thenin, tehfung hrang hrang – web presence, interactions, transaction, transformation hman a ni. Category I – official department website ah Mizoram Public Service Commission (mpsc.mizoram.gov.in) leh Environment, Forests & Climate Change Department (forest.mizoram.gov.in) te chu pakhatna an ni a. Category II – official institutional website ah Govt. Hrangbana College (ghbc.edu.in) chu pakhatna a ni.
Civil Services Day hi mipui rawngbawl tura inhlantharna ni atan hman thin a ni a. India ramin zalenna a chan hnua Union Home minister hmasa ber Sardar Vallabhbhai Patel-a’n Delhi-a administrative services officer-te hmaah thu a sawi ni – 1947 April 21 chu Civil Services Day lawm ni atan hman a ni.
ICT chief informatics officer Dr Lalthlamuana chuan “Presentation on Digital Platform – Utility, Challenges & Way Forward” tih thupuia hmanga a paper buatsaih a sawi a. LR&S joint director K Vanlalthiana buatsaih “National Generic Document Registration System”; ATI director Maria CT Zualai buatsaih “Best practices in the Villages with emphasis on Health, Education, Veterinary – a case presentation on Rengtekawn, Hnahlan & Muthi villages’ tih te ngaihthlak a nih bakah LAD director Rita Lalnunmawii Pachuau chuan Ngopa khua in India ram pum huap National Panchayat Award 2023 lawmman pakhatna an lak dan a sawi bawk.