ZPM-in bial thenkhata ding tur tifel

Eptu pawl ZPM chuan kum tawpa inthlanpui lo awm
tura an candidate tur thenkhat an tifel a, la tihfel lohte pawh an thlifim mek tih thu dawn a ni.
ZPM hian nomination committee an din a, anni hi vawi hnih vawi thum an thu tawh. April ni 20 zan khan an thu leh a, hetah hian bial thenkhata ding tur an tifel ta a ni.
ZPM hian a tirah search committee an din a, anni’n hun engemaw chen an buaipui hnuah thiatin nomination committee dinin an hma zui a ni. Nomination committee-ah hian chairman chu an party president Lalliansawta, secretary chu Dr Kenneth Chawngliana te an ni a, member-te chu Lalduhoma, K Sapdanga leh Vanlalhlana te an ni. Search committee-ah pawh Lalliansawta leh Dr Kenneth Chawngliana te hi chairman leh secretary an ni.
April ni 20 zana an relah hian bial 30 vel a fel a, mahse hei hi candidate tur ti tawl lovin bial lo viltu tur tia sawi te pawh an awm. Mahse candidate tur tihna chu a ni tih thu dawn a ni.
A lan danin, Aizawl West I-ah TBC Lalvenchhunga an ruat a, Aizawl West II, minister Lalruatkima khing turin Lalnghinglova Hmar, Aizawl West III-ah a ngai a ding ang. West II-a ding tura sawi Dr Lalnilawma chu |awi bial lamah a kal dawn nia ngaih a ni. Aizawl North I leh II-ah a ngai an ding ang a, Aizawl North III-ah K Sapdanga an ruat.
Aizawl East I, chief minister Zoramthanga biala ding tur hi a chiang lo nia hriat a ni a, PL Liandinga tia sawi an awm, Lalduhoma tia sawi an awm bawk. Aizawl East II, minister Robert Romawia Royte bialah B Lalchhanzova ruat a ni. Aizawl South I leh II-ah a ngai an ding ang a, South III-ah Baryl Vanneihsangi an ruat.
Thu dawn zel danin, Lunglei East-ah Lalrinpuii, North-ah Malsawmtluanga, South-ah Lalramliana te an tifel a, West-a ding tur a chiang chiah lo nia sawi a ni.
Tun hnaia ZPM-a lut pahnih, Vanlalsailova (Dampa) leh Jeje Lalpekhlua (Hnahthial) te pawh an chiang tih thu dawn a ni a, deputy minister Tawnluia bial Tuichangah W Chhuanawma a chiang tih thu dawn a ni bawk.
East Tuipui-ah Dr C Lalrammawia, Chalfilh-ah Lalbiakzama, Tuivawl-ah J Malsawmdawngliana, Tuirial-ah Laltlanmawia, Serlui-ah Jimmy Laltlanmawia, Kolasib-ah Lalthafamkima, Lawngtlai East-ah Dr Lorrain te an ni.
Thu dawn danin, heng hi candidate ni tura ngaih ni mah se candidate atana puan an la nih loh avangin tihdanglam theih chu a la ni.