Mipui rorelna kalphung thlak thei tur bill pharh ta
Indian sorkar chuan a rama mipui rorelna kalhmang siam thatna tling tur, parliament lian zawk siamna tur leh hmeichhiate tana seat hmun thuma thena hmun khat hauhna tur bill chu rorelna inah pharhin sawiho tan a ni ta a. Eptu party-te chuan inthlanna tihdanglam tumna niin an duh loh thu an sawi.
Prime Minister Narendra Modi-a chuan parliament-a rorelna in hniam zawkah state assembly-a member leh hmeichhia tihpun leh bial ramri siam thatna tur chuan India chu ‘kawng thar’ lamah a hruai dawn tih a sawi.
“He in chhunga (hmeichhiate) aw hian chakna thar, ngaihtuahna thar leh pawimawhna nasa zawk a thlen ngei ka ring,” a ti.
Sorkar chuan bial ramri tihdanglamna tur hi kum 1971 chhiarpui behchhana rin a nih thu leh hemi hnuah mihring punna a tam tawh a, rin that a hun niin an sawi bawk.
Modi-a kaihhruai National Democratic Alliance (NDA) sorkar hian parliament in pahnihah bill a tlang theihna turin an mamawh, hmun thuma thena hmun hnih thlawptu a nei bik lo va, party tenau leh eptu pawl thenkhat chu thlawp tura an hmin theih an inbeisei.
Eptu pawl lian tam tak chuan hmeichhiate tana bial hauhsak hi an thlawp thu an sawi rualin sorkar chu vote tam zawk an hmuh theihna turin kal dan tihdanglam tumah an puh a, parliament-a vote thlak hunah pawh an dodal dawn tih an sawi.
Eptu pawl tangrual lian ber kaihruaitu, Congress party chuan X-ah, “Sorkar chuan hmeichhiate bial hauhsak hi thil tiawlsam zawk turah an ngai a, pawm a nih veleh hman tan nghal tur a ni,” a ti.
Bill hi pawm a niha hman a nih chuan parliament rorelna in hniam zawka MP awm zat chu 55% velin a pung dawn a, 850 an ni tawh dawn a. State rorelna ina member awm zat pawh a pung dawn a, kum 2029-a parliament inthlanpui neih leh turah hman tan tura rawt a ni.
Bill hian assembly tihlena hmeichhiate tan seat hmun thuma thena hmun khat a dahsak turin a ti a. Kum 2023-a dan siamah hmun thuma thena hmun khat dah hi pawm a ni tawh a; mahse, chhiarpui neih hmabak nena inkaihhnawih a nih avangin kum 2029 inthlanpui dawt baka hman tak tak theih a nih a rinawm loh.
Thlak tur awmte hi dan a nih theih nan state legislature zinga a zahve talin an pawm a la ngai bawk.
Tunah hian Indian parliament hian hmeichhiate tan seat a hauhsak a ni lo va, vote nei mi maktaduai 968 zinga a chanve vel an ni thung a. Rorelna in hniam zawkah member zinga 14% chauh an ni a, in sang zawkah 17% chauh an ni bawk.
Ram chhunga state legislature-a member 10% vel chauh hmeichhia an ni bawk.