Mipui tan sawrkar sum luang tam tura siam politician mawhphurhna – Rosiamngheta

AMC corporator Rosiamngheta chuan mipui tan sawrkar sum tam zawk a kal theih nana ruahmanna siam chu politician-te mawhphurhna a ni tih a sawi.
Zirtawpnia Congress Bhavan-a inkhawmah Congress corporator chuan mipui hmathatna siam chu sawrkar mawhphurhna a ni a. Ram changkang apiangah sawrkar hnathawk an tlem a, sawrkar an suihte a. Mizoram pawhin hei hi kan tihmakmawh a ni, tiin a sawi.
“Tunah chuan kan budget chanve aia tam daih sawrkar hnathawk hlawhah a kalral a. Hemi siamthat hi politician-te mawhphurhna a ni. Ram changkangah chuan health care te, damdawi in awm mante a free a nih laiin, keini chuan dam khawchhuahna kan la sual ngat ngat a. Mipui lama hmasawnna luang tur zawngin kan kal tur a ni,” a ti. Politics chuan thatfalna niloin, that tlanna a thlen tur a ni a, miretheite dawmkang a, an retheihna ata chhanchhuak turin politics hman tangkai a ngai tih a sawi bawk.
MPCC general secretary Dr Lallianchhunga pawhin kan sawrkar hrawn mek chu sawrkar kal tawhte aiin ram inrelbawlna kawngah quality an nei lo zawk tih a lang chiang mek tih a sawi.
“Aizawl khawpuiah ringawt pawh tui an sem rual thei loa, VIP an ni tih mipuiin an hre loang tih hlauh vangin an lirtheiah designation plate lian pui puiin an tar a. Sawrkar Committee pawimawhah neutral zinga mithiam tak takte aiin ZPM mi leh sa an ruat zel a, hei vang hian sawrkar inrelbawlna quality hi kum hnih- thum chhung lekin a hniam phah viau dawn a ni,” a ti.