Mipui vantlang tana tha tur thilah sawrkarin theihtawp a chhuah – Dy CM

Mipui vantlang tana tha tur thilah
sawrkarin theihtawp a chhuah – Dy CM
MNF sawrkar chuan mipui vantlang tana tha tur thilah chuan theihtawp a chhuah thin tih deputy chief minister Tawnluia chuan a sawi.
Ningani zinga Ramhlun North Community Centre sak mek a tlawhnaah UD&PA changtu, deputy chief minister chuan Mizote chu inkawmkhawm let let, vantlang intawm tur hmun mamawh kan ni a, chutiang hmun Ramhlun North khawtlangin a nei tur chu a tangkai dawn hle tih a sawi. He Centre hi state sum liau liaua thawh a ni, tiin, “A bul (phase I) kan zo a, sum dapkhawm chawpa thil tih a tul thin. Phase-II kan tan leh nghal dawn a. A bul kan tan fel tawh vangin hawn theiha peihfel a nih thuai kan beisei,” a ti.
Khaw 28-ah hma an la mek tih sawiin, “MNF sawrkar hian mipui vantlang tana tha tur thilah chuan theihtawp a chhuah a ni. Khawtlang hruaituten ruahmanna leh rawtna an rawn thlente ngaipawimawh zelin, tlawmngai pawlte nen inrawnkhawm chungin UD&PA department chuan hma kan la thin. Sawrkar nih vang ngawtin duh dan danin hma kan la ngawt ngai lo,” Tawnluia hian a ti.
Hall lian chu sak chhung a rei a, veng mipui pawh an dawhtheih a ngai tih a sawi a. Consultant leh contractor ten tha thei ang berin an siam ang tih a ring tlat tih sawiin, “Hna phuailuai hi ka duh loh ber a ni. Vantlang hmun tur a nih avangin a tlo thei tur ang bera sak a ngai,” a ti.
SMART City project hnuaiah cheng vaibelchhe 500-in Aizawl khawpui cheithat hna thawh mek a ni tih deputy chief minister hian a sawi a. SIPMIU kaltlangin Tanhril hnuai Setlaklui, tuna Aizawl khawpui tui lak aia tam zawk pump chhoh an tum a, an zo fel tep tawh tih a sawi.
Ramhlun North Community Centre hi Mizoram state fund atanga thawh niin, sak zawhna’n sum sen ngai zat tura chhut chu nuai 778.72 vel a ni. A building hi chhawng nga niin – car parking, two wheeler parking, chowkider quarters, restaurant, health sub-centre, meeting room, local council house, conference hall, Badminton hall cum community hall te awm tura duan a ni.