Mipuiin chhiah kalhmang kan hriatchian zual a ngai – Dr Vanlalthlana

Zoram mipuiin chhiah kalphung leh mipuiah bawk a let leh dan kan hriatchian a pawimawh tih Taxation minister Dr Vanlalthlana chuan a sawi.
Minister hian December 15 khan Taxation department hotute a kawm a. An department chu Mizoram sawrkar tana sum hailuttu lian ber department a ni, tiin, tuna Mizoram sawrkarin sum harsatna a tawh mek pawh tiziaawm thei turin tan lak a ngai tih a sawi.
Hemi hlawhtlin theihna tur chuan Mizoram mipuiin chhiah chungchang kan hriatthiam a pawimawh tih sawiin, “Chhiah hi mipui pek khawm, sumdawngten sawrkara an chhun ve lehchhawn a nihna lai hi mipuiin kan hriat a, chu sum tlingkhawm bawk chu mipui leh ram hmasawnna atana hman leh thin a ni tih mipuiin hrethiam se ka duh a ni,” a ti. Department hotute pawh mipui hnena chhiah pawimawhna sawi tam turin a chah.
Taxation secretary H Lianzela chuan minister kaihhruaina hnuaiah department officer-te nen thawhona tha tak neih a beisei thu a sawi a. Thutkhawmah hian Taxation department hnathawh thlirhoin hmalak zui dan tur sawiho a ni.
Addl. commissioner of state tax HK Lalhawngliana chuan tun dinhmuna department inrelbawl dan leh chhiah an khawn dan kalhmang a sawi a. Department hi Zone 15-a then niin, district tinah Zonal Office an awm a; Aizawl district bikah Zone 4 a awm thung. Chu’ng Zonal office hrang hrang chu Commissioner of State Tax kaihhruaina hnuaiah an awm a ni.
Kum 2022- 2023 chhung Taxation department hian Mizoram sawrkar tan cheng vaibelchhia 1020.66 a khawn a. Kum kal mek. 2023- 2024 chhung hian November thleng khan cheng vaibelchhia 734.60 a lakhawm tawh. Kum 2020- 2021 chhung khan State’s Own Tax Revenue-a department contribution chu 90.68% a ni.