Mipuite duhthlan hmasa ber BJP – PM Modi

On Jan 19, 2026 2 0

Mipuite duhthlan hmasa ber BJP – PM Modi
Prime Minister Narendra Modi-a chuan Bihar assembly leh Maharashtra leh Kerala-a tual chhung rorel khawl inthlana hnehna an chan chungchang sawiin BJP chu ram chhunga mipuite duhthlan ber a nih thu a sawi.
“Vawiin hian BJP hi mipuite duhthlan hmasa ber a ni mek a. Kum khat leh a chanve liam ta chhung khan ramin BJP a rinna hi a pung zel a. Tun hnaia Bihar inthlanah kum 20 ro kan rel tawh chungin mipuiin vote hmuh leh bial lak zatah record thar min siamtir a. Ni hnih liam taah Maharashtra-a tual chhung inthlan result an puang a. Khawvela tual chhung rorel khawl lian ber pakhat, Mumbai-ah mipuiin BJP chu chiang takin hnehna min chantir leh a ni,” tiin Pathiannia Rs. vaibelchhe 6,950 senna tur, Kaliabor, Assam-a Kaziranga Elevated Corridor Project (NH 715-a Kaliabor-Numaligarh section-a 4-lane siamna tur) lung a phumnaah a sawi.
Modi-a hian BJP chuan Maharashtra-a khawpui lian tam zawkah rorelna an chang dawn tih a sawi a. A hmain Kerala-ah pawh an khawpui, Thiruvananthapuram roreltu thlanah an tling tawh bawk tih a sawi.
“Tun hnaia inthlanah mipuiten sorkar tha leh hmasawnna an duh tih a lang chiang a. An hmathlir chu hmasawnna leh changkanna a ni a, chu chu BJP an duh chhan a ni. Heng inthlanah hian Congress politic khelh dan tha lo chu hnawl a ni a. Congress din tanna, Mumbai-ah pawh tunah chuan 4/5-na an hauh tawh a. Kum tam tak ro an lo rel tawhnaah pawh Maharashtra ang bawkin an hniam zel,” a ti.
Modi-a hian Congress chu hmasawnnaah an hlawhchham avangin ramin a ringngam lo zel tawh niin a sawi a, Assam-ah ngei pawh thil tha an ti lo niin a sawi.
Assam-a BJP sorkarin dan lova sorkar ram luahtu a um chhuahte pawh Congress-in thuneihna leh vote an duh avanga dan lova a pum luhtirte a nih thu Inrinnia Guwahati-a Bodo hnam hunpui, Bagurumba Dwhou 2026 a hmanpuinaah a sawi bawk.
Prime minister-in Kaziranga Elevated Corridor Project lung a phum hi km 86-a thui tur niin km 35-a thui chu Kaziranga National Park & Tiger Reserve (KNPTR) chhunga kal tur a ni a, km 21 chu bypass section tur niin NH-715 highway section tihzauhna tur a ni bawk.
Thuneitute chuan Brahmaputra a lena tui chim chin a san hian ramsaten hmun sanga kal turin national highway an zawh thin niin an sawi a. Kawngpui sang zawka siam a nih hnuah erawh an che vel a tibuai tawh lo vang a, mihring nena intihbuai a awm tawh dawn lo niin an sawi a. Kawngpuia zin a him ang a, zin chhung hun hman a tawi ang a, passenger leh bungraw phur tan a tha dawn niin an sawi.
“Kaziranga hi national park a ni mai lo va, Assam thinlung a niu tel a. India tan biodiversity lunghlu a ni a, UNESCO-in World Heritage Site-a a chhinchhiah a ni a. A hmunhma leh ramsate hum hi kan mawh a ni,” tiin Modi-a chuan a sawi.
Prime minister hian samak ki khat nei pel an tam thin pawh tunah chuan an tlem ta a, BJP sorkarin a tihtawp nan hma a lak nasat vang niin a sawi.
Modi-a hian Amrit Bharat Express rel thar pahnih – Guwahati (Kamakhya)-Rohtak Amrit Bharat Express leh Dibrugarh-Lucknow (Gomti Nagar) Amrit Bharat Express a vai liam bawk.
“Congress hun lai khan Assam-a rel budget hi Rs. vaibelchhe 2,000 a ni thin a, tunah erawh Rs. vaibelchhe 10,000-ah a pung tawh a. Hmarchhak hi tunah chuan thinlung (dil) hnaihah chauh a awm tawh lo va, intlawhpawhna tha avangin Delhi (Dilli) pawh a hnaih tawh a ni,” a ti.