Mirza hnua champion leh thei hmasaber Karman

Pathianni khan sum tam lama teha hmeichhe tennis inelna level laihawl ITF women’s world tour USD 60,000 tournament-ah India nula Karman Kaur Thandi chuan 7-5 4-6 6-1-a Ukraine player Yulila Starodubtseva hnehin, Sania Mirza hnua Indian zinga USA leilunga professional title sualchhuak leh thei hmasaber a ni.
US tournament Evansville event-a a champion hnuah Thandi hian a career-ah W60 ITF title pahnih a la tling chiah a, nikum khan Saguenay lamah he level title hi hlawhchhuak tawhin, a career-a title hrim hrim pali a lakna a ni thung.
Evansville khaw tournament-ah Karman hian Maria Fernanda Navarro of Mexico chu round 1 lamah hnehin, tualchhung nula Maribella Zamarippa a hneh leh hnuah United States wild card Allie Kiick chu 6-3 6-3-a hnehin quarter-final a lut.
Semi-final lamah pawh tualchhung nula bawk Mccartney Kessler laka 6-4 7-5 hnehna nen final a lut a, Ukrainian laka chungnung zawkin Mirza hnu lama US leilunga pro title la leh thei hmasaber a ni zui ta a ni.
Karman hi WTA singles ranking-a 261-na luahtu niin, Indian player zingah khawvel women’s player ranking-a sang ber dawttu a ni.
Tunhnai khan Canada lama khelh W60 Saskatoon Challenger double-ah runner-up niin, USA-a W60 Sumter Palmetto Pro Open singles-ah pahnihna a ni bawk.
A tir lama tarlan tawh angin, Karman Kaur Thandi champion-na W60 event hi ITF women’s World Tour-a prize money tam leh tlem atanga teha tournament laihawl (mid-level tournament) niin, ITF World Tennis Tour tournament-ho hrim hrim hi WTA event-ho hnuai inelna a ni.
Tennis tournament-te hi tour code leh prize money level ang zawnga sawi leh hriat thin niin, Women’s Tour hi prize money level pangaa then a ni a, chu’ngte chu – USD15,000 (W15), USD25,000 (W25), USD60,000 (W60), USD80,000 (W80) leh USD100,000 (W100) tihte an ni.