Mittui nen India legend Chhetri chawl ve ta…
Kum 19 zet ram tana a khelh chhunga India tan goal 94 thuna international football-a goal khung tam palina ni pha Sunil Chhetri chuan Ningani zan khan Kolkata khawpuia 2026 FIFA World Cup qualifiers match a khelh zawh rualin international football a chawlhsan ve ta a, a puala hun hmanah a mittui a dang zo lo.
Salt Lake Stadium-a entu mipui 58,921 zet hmaah India legend Sunil Chhetri hian a hun hnuhnungah Blue Tigers a chakpui zo lo a, Arab team nen goal awm loa inhnehtawkin, India tan World Cup qualifying kal laia round sang zawk luh chhohna kawng a ping tluk a ni ta!
Ningani zan khan chak ni se point riat hum chungin table-a pahnihna luah mektu India hian World Cup qualifiers third round an lut thei dawn a, mahse, Group A second round khelh hmabak pakhat an la neihah June ni 11 hian Asian champion Qatar an hmachhawn dawn a, an chak zawh a rinawm loh a, Qatar hi an hneh zo lo a nih chuan point li hum chunga table mawngphah luah mektu Kuwait hian Afghanistan an hneh chuan India lehpelin third round an lut dawn a, team pahnih hi an inhnehtawk a nih pawhin pathumna ni mek Afghanistan hian India hmakhalhin second round an paltlang zawk dawn tho tho!
India captain thlahna lam hawi chhunzawm ila.
Ramin pet-goal-tu a mamawhna a san em avanga striker ni chunga kum 40 tlin dawn thlenga national team tana inlan Delhi tuiliak kum 39-a upa Chhetri hian, tarlan tawh angin, ram tana game 151 a khelhah goal 94 khawl tlingin, international football-a goal khungtu ropui leh langsar a ni pha a, ani aia ram tana goal thun tam awmchhun pathumte chu Portugal superstar Cristiano Ronaldo (128), Iran legend Ali Daei (108) leh Argentine wizard Lionel Messi (106)-te chiah an ni.
Chuti taka goal khung tam a nih avangin May ni 16-a a chawlh tur thu a puan pawh FIFA-in a ngaihven a, a hriatpui thu a tichhuak hial a ni.
Mipui 68000 lenna Salt Lake Stadium-a a hun hnuhnung thlahliam tur khan mipui zingah a a nu leh pa Kharga leh Sushila bakah a nupui Sonam Bhattacharya-te hmuh tur an awm a; international football-ah inlan chhunzawm tawh dawn lo mah se club football-a erawh hmuh tur a la awm dawn a, Indian Super League club Bengaluru FC-ah nakkum thleng daih contract a la nei.
Chhetri hian June 12, 2005 khan Quetta khawpuiah Pakistan hmachhawn chungin a debut match a nghakchhuak a, thenawm hmelma lian nen 1-1-a inhnehtawkna game-ah ram tan goal a khung nghal nghe nghe.
Kolkata khawpuia captain thlahliamna inkhel ni nghalah stadium chhung mipui chu ‘Sunil, Sunil’ tiin an au bang thei lo a ni ber a; khelmual chhung hmun tinah Blue Tigers captain thlahna leh chawimawina thuziak lian pui pui a phe hlup hlup bawk.
Kum 19 chhunga international football zinkawng a lo zawh tawp zan khan a team-mate rualin Indian football icon kha ‘guard of honour’ nen an thlahliam a, Salt Lake Stadium chhunga mipui sing telin legend kalbo tur chu zahna hnuhnung ‘standing ovation’ an hlan bawk.
Hnukulh teuh chunga thu sawiin Chhetri chuan, “Ka inkhel lai video min ensak thintu, autograph min sign-tirtu, hun kal tawha supporter zawng zawngte, in zaivaia chungah ka lawm e.
“Nangni hi awm lo ula he kum 19 chhung hi ka tan chhiarlet turin a awm ngai lo ang. Hei hi ka rilru tak taka ka sawi a ni,” tia a sawi hnuah Bengali-in a chhunzawm a, “Shobai bhalo thakben, shobai khushi thakben (lo inenkawl tha ula, lo hlim rawh u), ka lawm takzet e,” tiin a thusawi a zialfel.
Inkhelh banah All India Football Federation lamin captain chawl ta pualin chawimawina leh thlahna hun an buatsaih bawk.
Salt Lake stadium zawh hnu lawk khan FIFA pawhin X-ah post siamin, kum 19 hnua chawl ta Chhetri an mangtha a; Asian Football Confederation pawhin “International goal 94. A ram tana beiseina phurtu! Thank You Asian Football Icon, Sunil Chhetri,” tih socoal media-ah an tarchhuak ve bawk.
Indian cricket icon Tendulkar pawh X-ah bawk Chhetri puala tawngchhuakin, eng hlawhtlinna mah hi awlsam taka hlawhchhuah theih a nih loh thu leh goal 94 chu thil namai a nih loh thu sawi chungin, “Hnam puanzar khaisangtu i ni a, i career ropui bik avangin ka lawmpui a che.”
Club lama a khelh mekna Indian Super League club Bengaluru FC pawhin social media platform kaltlang bawkin an striker hmunruak chu tu ma hnawhkhah theih a nih tawh loh thu an sawi.
Fak chunga Chhetri thlahtu langsar zingah India hockey captain hlui Viren Rasquinha bakah Indian Premier League (IPL) team hrang hrang an tel a; Croatia captain leh Real Madrid superstar ni bawk Luka Modric chu international star zinga Chhetri thlahna chhakchhuaktu langsar niin, Indian team coach Igor Stimac kaltlanga video message a tihchhuahah, “Hi Sunil, national team tana i game hnuhnungber atan duhsakna ka hlan a che.
“I football zinkawng avang hian ka lawmpui che a, he game (football) leh i team-mate tan legend i tling a, ram tana i match hnuhnungber hi special tak leh hriatreng hlawh tur lo ni mawlh rawh se.
“Duhsakna ka hlan vek che u a, in captain tan hian chak ngei ang che u. Croatia ram atangin ka duhsakna sangber nen,” tiin 2018 Ballon d’Or winner chun duhsakna a thawn.
India trophy engemawzatah Chhetri hian hmun paiwmawh a luah a, Nehru Cup (2007, 2009, 2012) an lakna kawnga player thawhhlawk niin, kum 2011, 2015, 2021 leh 2023 SAFF Championship-a India champion-puitu a ni bawk.
2008 AFC Challenge Cup final-a a hat-trick hmangin India a chakpui a, kha result avang khan kum 27 chhunga a vawikhatna atan India chuan AFC Asian Cup a khelh phah nghe nghe a ni.
Sunil Chhetri awm loh hnua India tlarhma awm dan tur hian Indian football fans ngaihtuahna a tibuai a, a hmunruak hi engti taka zau nge a nih dawn hriat theih a ni rih lo!
Ningani 2026 World Cup qualifiers-ah khan bultantu zingah Lallianzuala Chhangte telin, khel che hran lo mah se cross vawinga a siamchhhuahah vawihnih a vawrh dik a, mahse, goal-ah a chang zo lo.
Edmund Lalrindika pawh hun tawp hma minute riat la awmah luhtir a ni a, Sultan Alenezi nen an inbakkaih vangin Chinese referee Fu Ming chuan Indian debutant Dika leh Arab player hi yellow card hmangin a zilhhau.
Mittui nen India legend Chhetri chawl ve ta…
Get real time updates directly on you device, subscribe now.
Prev Post
Next Post