Zanin final: Swiatek vs Paolini
Zanin final: Swiatek vs Paolini
Champion lai Iga Swiatek chuan a hneh than Coco Gauff laka 6-2 6-4 hnehna chang lehin zanin 2024 French Open hmeichhe singles final a lut a, a zawna Roland Garros title vawithum la tling thei turin match khat chiah chak a ngai tawh a, Italian 12th seed Jasmine Paolini a hneh chuan a career-ah Grand Slam title panga a khawl tling ve tawh dawn a ni.
World number one Swiatek hian semi-final match game khatnaat third seed Gauff a break nghal a, set hnihnaah serve a han hloh ve zawk tih loh chu inkhel a thunun tluanchhuak a; ti hian, kum 20 mi American hian tum 12 Pole a hmachhawn takah vawikhat chiah chakin, vawi 11 a tlawm tling ta a ni.
Roland Garros an thlawhchhuahsan hnua tennis world ranking thar tarchhuah turah Swiatek leh Gauff hi top two women’s player an ni ang.
US Open champion Gauff hian quarter-final lama grand slam final vawithum khel tawha la chak zo lo vek Ons Jabeur a hneh tum khan semi-final game thlirin, Pole lakah a chak lo zawkah a tang leh a nih pawhin hloh tur a neih loh thu leh Swiatek zawk chu ‘pressure’ nei chunga khel tur a nih thu a sawi a, mahse, Ningani last four match-ah tan phat atangin American mihang player hi a ngam loh laklawk Swiatek lakah a nervous hle tih a hmuh theih a, beisei lawk ang ngeiin a tlawm zawkah bawk a tang chhunzawm leh ta a ni.
Set khatnaah khan Gauff hian unforced error tum 18 ngawt neiin, a hawiher leh chetzia en khan American ‘pressure’ a phur lian hle tih hai rual a ni lo!
Ningani semi-final inkhel hnuhnung zawkah kum 28-a upa ni tawh chunga inkhel liana hriat la hlawh em em lo Paolini chuan Russian tleirawl kum 17 mi lek, unseeded lehnghal Mirra Andreeva 6-3 6-1 hnehna changin final a lut a, hmeichhe player zinga French Open title vawithum la zawn thei pathumna nih tum mek Swiatek-i ropui lehzualna tur inmung mek hi a dang thei ang em tih chu tennis khawvela zawhna lian a ni mek.
Open era an tih hunah Monica Seles (1990-1992) leh Justine Henin (2005-2007)-te chiah kha hmeichhe zinga Roland Garros title vawithum la zawn thei an la ni a, Swiatek hi player ropui pahnih hnungzuitu ni thei ngei tura ngaih ngheh ni mah se a tumkhatna’na major singles final lut ve chiah Paolini hi Andreeva lakah khan a khawng riau mai a, Roland Garros-ah hian a career-a mellung pawimawh a phun chho thluah mai bawk si a, defending champion hi a barakhaih thut mai ang em tih chu zawhna chhan theih loh a ni rih.
Tunhma lamin Paolini hian Paris-ah second round a la pel ngai lo a, kumin Dubai-ah khan a career-a a WTA 1,000 title hmasaber hlawhchhuak ve chauhin, khati kawngah khan top-20 player a paltlu nual a; French Open kal mekah pawh hian quarter-final lamah third seed Elena Rybakina hnawtchhuakin, a forehand pui tak hmangin 38th-ranked Andreeva a thawnhaw leh bawk.
Jasmine Paolini doubles partner Sara Errani khan kum 2012-ah French Open final lut hlawlin, kha mi hnuah Paolini hi Italian player zinga Paris clay final thleng leh thei hmasaber a ni.