Mittui nen John Isner a chawl ta

US Open 2023 khelh mekah Ningani zan khan John Isner chu inkhel hmuhnawm takah Michael Mmoh hneh lovin a tlawm a, kum 17 chhung zet nuam ti taka hun a lo hman tawhna Tennis chu mittui nen a chawlhsan zui nghal.
Kar liam taah US Open atanga a tlak ruala Tennis a chawlhsan tur thu lo puang lawk tawh Isner hian Ningani zana a khingpui Mmoh lakah bul a tan tha a, set hnih a la hmasa. Set khatna leh set hnihnaah break a neih chhawr tangkaiin set a la zawn a, third round lut ngei tura ngaih a ni hman.
Dinhmun chhe taka ding tawh Michael Mmoh hian huaisen takin a khingpui a bei let a, a khel tha zui ta hle. Set thumnaah inhnehtawk taka game an inlak chhawk zak zak hnuin tie-break-ah Mmoh a chungnung a, set a la. Set linaah Mmoh a khel tha chhunzawm a, break a neih chhawr tangkaiin set a la zui leh. Decing set-ah an inhnehtawk zui viau a, tie-break hmanga thelh an ngai zui leh. Tie-Break-ah Mmoh a chungnung zui leh a. Inkhel hautak takah John Isner chu 3-6, 4-6, 7-6 (3), 6-4, 7-6 (7) in a chak lova, US Open atanga a tlak rualin, Tennis a mangtha zui nghal bawk.
6ft 10in zeta sanga John Isner hian kum 2007 atang khan professional Tennis a luhchilh tan a, single title 16 a la tling hman. ATP Ranking-a a san ber tumin World No. 8 a ni. A pa lian bawka a service a na hle a, a service na hi a larpui hle. Tennis a khelh chhungin vawi 14,470 zet aces a nei a, Tennis player zingah ace ngah ber a ni a. Amah hnaih bertu aiin vawi 700 zetin ace a la nei tam zawk cheu. Ningani zanah Mmoh laka a tlawm tum pawh khan ace hi vawi 48 zet a la nei cheu tho a ni.
Alcaraz a chak
Zirtawp zing khan champion lai Carlos Alcaraz chuan Lloyd Harris a hmachhawn a, set hloh lova hnehna changin third round a lut a. Third round-ah British chhuanvawr Dan Evans a hmachhawn zui leh ang.
Alcaraz hian Harris lakah bul a tan tha a, set khatna tir lakah break a neih nghal a chhawr tangkai a, game thum chiah hloh chungin set hmasa a la. Set hnihnaah tha zual zawkin a inlan a, game khat bak a hloh lo. Set humnaah South African Harris a khel tha hret a, tie-break khelh a ngai ve ta hial. Tie-breakah Alcaraz a chungnung zui leh a, 6-3 6-1 7-6 (7-4) a hnehna changin third round a inhlangkai ta a ni.
Champion lai Alcaraz hmaa ding tur Dan Evans hian Ningani zan khan a khingpui Botic van de Zandschulp chu 1-6 6-1 6-3 6-3 in a hneh. Evans a chak lai hian World No. 1 hlui Andy Murray chu second round paltlang zo lovin a tla ve thung. Murray rual hian Italian Matteo Berrettini pawh second round paltlang zo lovin a tla ve bawk a. Berrettini hian hliam a neih vangin a khingpui Arthur Rinderknech a hmachhawn tluan thei lo.
Berrettini a tlak lai hian Italian dang Jannik Sinner chuan second round paltlangin third round a lut. Alacaraz kawng dal thei tura rinkai zinga mi Sinners hian 6-4 6-2 6-4 in a hnampui Lorenzo Sonego a hneh.