Mittui nen Ronaldo World Cup beiseina a thamral ta…

Kum 41 mi ni tawh chungin kuminah a tawpna’n World Cup trophy a han beisei leh fan fan a, mahse, a duhthusam ram chu Thawh\anni zan khan Spain-in an chhilhbosak ta a, world champion ni ngai lo tur footballer ropui kalbo tate zinga chhiar tel a ngai ve nge nge dawn ta a ni!
Portugal captain lo pawh hi football legend zingah he trophy hlu bik chawi loa ballboot khai hul ta an kat nuk a, chu’ng mite sawichhuah nikhuaa a langsar ber pawl a ni kumkhua tawhin a rinawm!
Dallas Stadium-a mipui 70,649 pungkhawm hmaah team pahnih hian quarter-final luh inchuhin, minute 90 chhungin a khawi lam ve ve mahin goal an khung zo lo tihah hun pekbelh minute khatna a kal mek laiin Spain tan Ferran Torres siamsak a\angin substitute Mikel Merino chuan team pahnih \henhrangtu, World Cup-a Ronaldo ral hlenna goal ni bawk thunin, mittui nena Cristiano Ronaldo World Cup career tawp lai khawvelin a thlirliam!
Portuguese superstar hian a hmain kumin bak World Cup khelh a tum tawh loh thu a lo sawi tawh a ni.
Texas lama heavyweight last-16 match-ah khan team pahnih hian goal thun theihna hun \ha nei nual ve ve mah se an hlawhtling zo tlat lo a, chu’ng zingah chuan first half-a Portugal hmahruaina goal ni thei tur Nuno Mendes-a ball-in goal kham a per kha Portuguese fans tan uiawm duh tak a nih hmel!
Second half-a clear-cut chance han tih tur chi siamchhuah harsat Spain hian quarter-final match pakhatah a thlengtu pakhat United States hnawtchhuaktu Belgium an hmachhawn leh dawn a ni.
2010 Fifa World Cup round of 16-ah pawh khan si khat fai bawkin European champion lakah tho hian Portugal hi an lo tlawm tawh a; kha mi kuma La Roja chakna goal awmchhun kha second half minute 63-a David Villa thun niin, kuminah pawh kha mi \uma an chak loh phuba kha Potuguese-hoin an la zo lo a, super-sub Merino ‘killer goal’ an ngam leh ta lo a ni!
Nikum Uefa Nations League final-ah kha chuan extra time zawh thlenga 2-2 a la nih hnu penalty petah 5-3-in Portugal an vannei a, kha mi \uma an tlawmna phuba kha tournament lian leh pawimawh zawkah Spain-in an la thei ta bik a ni.
Kum 2023 a\anga Portugal national team enkawl tawh Spanish coach Roberto Martinez chuan European Championship leh 2026 World Cup-a team a enkawl hnuah Portugal a chhuahsan thu a puang ve ta bawk.
Euro 2016 trophy an lak \uma an captain, hruaitu leh team tiphurtu ber Ronaldo hi Europe-ah chuan club inelna sang ber Champions League-ah pawh vawi nga ngawt a champion tling tawh a, mahse, Toronto khaw last-32 game-a Croatia an sut hma chiah khan a farnu pawhin tun tournament hi Ronaldo World Cup hnuhnungber a nih tawh tur thu social media lamah a dah chhuak ve bawk a, chu chu an dinna a ni hlen dawn ta a ni.
Spain rising star Lamine Yamal kha a fel ve angreng, kha tia, inkhelh bana Cristiano Ronaldo lung no insut kha va panin, mittui nena inchiahpiah Portugal captain kha sportsman rilru dik tak pu chungin a va hnem a, a chet dan khan a lo hmutu football fans rilru pawh a hneh hle niin a lang.
Spanish rawlthar kum 18 mi lek hian a team-mate rual hlim sahawkin quarter-final luh an lawm mup mup laiin Portuguese legend rilru na kuah kha a thlang hmasa a, chhumpui nasa tak anga thlirtu fans lam pawhin Yamal-a chet dan kha mawi an ti a, Spain star tan thawm an chhuah hial nghe nghe!
Club leh ram tan belhkhawma goal 976 thun tling awmchhun Ronaldo hian record a kawl zingah World Cup vawi ruka goal khung vek thei ni tel bawkin, he tournament-a a champion teuh ber \um chu World Cup a khelh vawi khatna kum 2006-a semi-final a luhpui kha a ni.
Kumin hi a final World Cup a nih tawh tur thu lo sawilawk tawh mah se ram tana la inkhelh chhunzawm a tum leh tum loh zawhna erawh, “Ka chhungte nen kan han sawiho ang a, thluak fim zawkin thutlukna kan siam ang,” tiin international football chawlhsan rum rum erawh a la tum nghal mai loh thuin Spain laka an tlawm hnuah chanchinbumite zawhna a chhang.
Ronaldo hian kumin World Cup-ah goal thum thunin, goal hnih chu Uzbekistan a ni a, Croatia lamah penalty goal khat a chhuihlut bawk.
Spain laka an tlawm hlim thleng khan 2026 World Cup kal mekah hian amah aia goal khung tam player 10 awm hman mah se Ronaldo shot neih zat (18) aia tam nei chu player pali chiah an ni.
Spain game-ah khan minute 90 chhungin \um 19 chiah ball tawk fuh mah se Ronaldo khan shot vawi thum nei tlingin, a team-mate tan chance \um khat a siamchhuak bawk.
Tun World Cup-ah hian Ronaldo telin nge tel loin Portugal tana champion-na chance sang zawk tih inhnialna kal zelah BBC pundit Chris Sutton chuan inngaihtuahbuai eih loin Portugal captain kha putar pen \ha hlei thei tawh lo nen a tehkhin a, Portugal tlak chhanah a puh nghet hmiah!
England striker hlui chuan, “Cristiano Ronaldo khan engmah tih a nei lo, a nei lo takzet.
“Roberto Martinez tehreng pawh khan a team tan engnge tih a neih? Nawrhchizuar ruaitu ang mai a ni a, Portugal tlak chhan dang a ni,” a ti siah siah!
Final whistle rik ruala a hna vawn lai a bansan thu a puan rualin boss Martinez chuan ‘football icon’ Ronaldo fakin, “Tun World Cup-a team chhampion-pui a tumna kawngah a laka lawmthu sawi hi kan ba a; a dream chu World Cup trophy hi niin, chu mi a beisei kawnga a thiltih hi example mak a ni.
“Football tan pawh entawn tur pui ber a ni a, infiammi a nihna phena a mihring mihrinna zawnah pawh chuti tho,” tiin a fak.