Mizo dawrkai Vai dawrkai

Lallunghnema
Charity Lodge
Cont: 9862288182

Chhiartu zawng zawngte chibai tha ber ka buk a che u.
In thahnemngaih zarah tun hi kan thleng thei a ni. Amah erawh chu, chhiar ringawt lo a, nunpui turin ka beisei che u a ni. A theih phei chuan mi dang pawh in thil hriat te chu hrilhin pe chhawng zel rawh u, tiin ka chah duh che u, a ni.
Ziak leh thil tiha hma lâk hi a tangkai ve ve a. Ziak loh leh tih loh erawh awmze nei lo a ni. Kan chhiar ang a, kan sawi ang. Kan ûm zui ang a, kan bawhzui zel bawk ang. Chu chu thil awm dan tur a ni. Kan thiltih hian chawp chilhin hna thawk lovin, tangkai lovin lang thin bawk mah se, khawi khawiah emaw hi chuan kawng ro a su thin tih ka hria a, rah tha a chhuah fo a ni. Hlawhtlinna hian phurna min pe thin a, chakna thar min pe thin a, min fuih phur fo thin a nih hi! Inti changkang ho hian ‘feed back’ zu ti kher thin a! Chuvângin châwl lovin kan thawk zel ang a, kan kal zel dawn a ni. Rethei tê mah ni ila.
Consumer-te Dikna leh Chanvo tulzia hre chiangtute chuan Consumer-te hi sumdawng pamhamte salah an tang reng tih hriain an zalen hmâ chuan an bei zêl dâwn a ni.
Ka chêt velna chanchina hriat hrehawm ka tih ber thin chu an customer-te laka hlei len ching sumdawng leh dawrkai ho hi an ni. Hengho hian anmahni dawrtute chu engah mah an ngai ngai lova, an lo be tha duh lova, an lo tihtauh khum thin a ni.
Tunlaia ka buaipui pawh hi sumdawng zinga anmahni customer-te lo chapo khumtu, lainatna leh duhsakna pakhat mah nei ngai lote an ni a. Hetih lai hian sumdawng thenkhat chu an lo hmuingil a. Pathian hruaina zarah an tluang viau mai a. An lo lian thur thur tan a, an iduh tâwk ta thin a. An hlawhtlin hmâ chuan an hawihhawm em em a, an zaidam, an nun nêm hle! An kâ pawh zen ila, min seh lo ang, min hap hek lovang, kan ti thin. Hengho hian an hlawhtlinna te chu an customer-te vang liau liauvah an ruat ngai lo! Customer tha vang, an ti ngai hek lo. An customer-te chu an lo hmuhsit phah ta thin zawk zu nia maw le! Hei hi a pawi em em a ni. An innghahna zawk tur chu Customer ngah leh neih tam a ni si a. A mak thin khawp mai.
Mizoramah hian dawrkai chi hnih an awm a. Mizo dawrkai leh Vai dawrkai kan ti thei ang. Mizo sumdawng leh Vai sumdawng ti pawhin kan sawi thei bawk ang. Mizo dawrkai chungchang Consumer Group member-te sawi dan (Comment) thenkhat i lo ngaithla teh ang.
*Sumdawng tih an inhre lo emaw tih mai tur an ni hlawm…….an kâwk kual mai mai a….
* Vai sumdawng hi ning viau mah ila, an pung zel dawn.
* Coffee han in sak dawn ila, kha ta kha no….an ti mai. Mizo dawr hi duh viau mah ila, kal pelh mai an awl khawp mai.
* Kan Mizo mizia leh sumdawnna hi chu a inmil vak lo a ni.
*Sumdawng hlawhtling ni tur chuan taimak, thawh hmâ leh thawh tam, dawhtheih, inngaihtlawm a ngai.
* Mizo chuan tlem thawha hlawk leh hausak kan tum a, a intuha vak lo a ni.
* Mizovin kan zir tur pawimawh tak chu tlawmna nun hi a ni. Lu mêt ho hian, an tlâwm a, an mehsak a ngai.
* An mehsakte duh dan ang ngaihchân thiam a ngai. Vai mehtir mai awl tak a ni.
* Chutiang zelin Mistiri pawh, an va thawhnate duh dana an kal thiam a ngai. Duhzawng va neih tâlh tum an awm thin.
* Tin, thingpui dawrah vai hovin min welcome tha. Vai dawr hi an nuam. Kan (Mizote) inphah hniam a, min dawrtu / chhawrtu kan zah thiam an ngai.
“Lo rawh, lo inbûk rawh”, te min tia.
* An ngawi ngul hlawm mai bawk si.
* Customer-te thil lei, motor-a han hlansakte hi an hreh ngawih ngawih mai a ni.
* Vaiho chuan an pack zawh chuan motor an pan nghal nal nal mai a ni.
Tuna ka han phochhuah mek, kan thian thenkhatte thusawi hi fiamthu a ni lo! An tawnhriat a ni. Thupuia kan hman ang hian Mizo dawrkai leh Vai dawrkaite mizia hi a inang lo hle a. Mizo dawrkai zia hi a nawi tlangpui kan ti thei awm e. Dawrkai mize hraw leh entawntlak dawrkai hi chuan ding chhuak sa a inngai ang hrimin anmahni dawrtute hi an ngaihsak tha tawk lo hle a.
A sap tawng takin, “Customer Care’ an nei tlem tlangpui a ni. Hei hi an hlawhchhamna bul pakhat pawh a ni. Customer Care-in a ken tel chu Customer Satisfaction hi a ni a. Dawrkaiin Customer Care a neih that chuan Customer Satisfaction a thleng thin a ni. Heng hi vai sumdawng leh dawrkaite chuan an ngahin an nei tha em em a. Vai sumdawng tam zawk hi entawn tlâk an tling a ni.
Heti ang êm êma Vaihovin Customer Care an nei tha thei hi eng vang nge ni ang tih chu zawhna awm fo a ni a. A chhan dân pawh thiam a har ngei ang.
Vai sumdawng leh dawrkai hlawhtlinna bul chu dawhtheihna, hawihhawmna, taimakna leh rinawmna hi a ni a. Pawisa hlutna an hre chiang a, nun awmzia an hre bel bawk.
Mizo dawrkai leh sumdawngte tlakchham chu a chunga kan sawi tho hi a ni. Mizo dawrkaite chuan hawihhawmna an tlachham. Mizo dawrkai tam zawk an chapo laiin vai dawrkaiho chu an vaiin an chapo lova, an inngaitlawm zawk thin. Vai dawrkai chuan hmuhsit an phur ngam a, Mizo dawrkai chuan hmuhsitna an phur zo ngai lo. Mizo dawrkai thu vuak thlâk chu “Lei lo mai rawh”, tih a ni ber. Chutih laiin vai thu vuak thlâk erawh “I duh chuan kan tlawm ang che, I duh duh thlang rawh”, tih a ni thung. A eng zawk nge hlawhtlinga i rin? “Lei lo mai rawh”, ti tu te nge? “ I duh thlang rawh,” ti tu ? Chaw nghei hmabâka dawrkai leh sumdawn a awm theih a, hlawhtlinna hmabâka dawrkai a awm theih bawk.
Vai sumdawng chuan hlep tlêm, hralh tam chu an an tum ber a ni a. Mizo sumdawng erawh hlep tam, hralh tlem a ni thung. Hetih laiin Mizo zawng zawng erawh an sumdawng thiam lo lo ve. Mizo dawrkai hlawhtling an awm. Mahse Mizo dawrkai leh dumdawng hlawhtlinnna chu ‘tih fuh’ a ni. ‘Dawrkai thiam lo’ tih hi kan inhmuh dan chu a ni.
He article ka buatsaih lak lawh lai hian tul ka neih avangin ka têi chhuak zawk a. Mobile phone sales & service-ah ka leng lut a. Ka va biak thawktu pakhat chuan min lo be tha peih lo hle mai! A dam tha lo a nih ka ring a. ‘Nge a hrisel lo em ni ang? An chhungkuaah harsatna an tawk em ni zawk ang?Ka be tawng thei mang lo! He mi hian a thawh loh tur a thawk a nih hi! tih thinlung ngaihtuahna ril tak nei chungin ka khawngaih ta em em a! Chu dawr chu ka article ziah chhunzawm turin ka chhuahsan ta a.
Ka haw kawngah chuan a hmâ ni a Director pakhat zawhna ropui leh hlu tak chhan thiam har ka tih em em si chu ka ngaihtuah chhuak a. Chu zawhna tha tak, chhan thiam har ka tih riau chu hei hi a ni.
“Eng vanga heti tak mai a, Consumer right a tui leh buaipui hi nge i nih”? tih hi. Ka chhanna ni ta chu :
“Consumer-te hian an thil leinaah harsatna leh buaina an tawk nasa hle a. MRP aia sanga thil lei te, buk tling lo leh teh tling lova thil lei te, service belh chian dawl lo leh chhia lei te hi a nasa hle a. Consumer-ten sum an khawhral nasa em em bawk a. Eiruk leh hlemhletna a nasa hle bawk. Ei-in thianghlim lo leh hriselna atana hlauhawm lakah consumer-te hi venhim hi a tul êm êm a ni. Consumer-te tuarna hi ni tin darkar tin a thleng reng a. Ka theih ang angin ka dodal duh a ni. Consumer-te hnena justice a thlen theih nan kan ‘fight’ zel dawn a ni,” tiin.
Kâr lehah ka tawn hriat. Lo chang rawh, lo chhiar rawh.