ZMC&H ah lung tha lo zai hlawhtling

Zoram Medical College & Hospital (ZMC&H) ah Ningani khan open heart surgery (Coronary Artery Bypass Graft) chu hlawhtling taka tih a ni.
Lung zai thiam, cardiothoracic surgeon Dr Mary Hmingthantluangi leh Apollo Excel Hospital Guwahati atanga lokal, cardiothoracic surgeon Dr Intekhab Alam ten hlawhtling takin damlo kum 69 mi an zai a. Damlo hian thla 6 kalta khan heart attack neiin, lung natnaa zai hautak ber chi – Triple Vessel Disease natna a nei a; darkar 6 leh a chanve chhung an zai a ni.
Doctor-te hian thisen zam pawimawh pathum block an siamthat chhungin, damlo lungphu an titawp lailawk a. Lung hnathawh hi khawl (heart- lung machine) hmanga chhawk niin, thisenzam siamthat a nih hnuah lung hi an tinung leh a. Lunga thisen zam chhia siamthatna atan hian damlo kea thisen zam (saphenous vein) leh damlo awm (chest) a thisen zam (LIMA) an hmang a ni.
He inzaina hautak takah hian ZMC&H Anaesthesiology Team-ten khawl changkang leh tha tak tak hmangin damlo hi an vil reng a. Cardiologist Dr Lalthafala pawhin uluk takin zai chhung zawng hian a vil bawk.
Damlo hi zai zawh a nih hnuah ICU-ah enkawl chhunzawm turin dahluh a ni a. Hlawhtling taka zai a ni. Dr Intekhab Alam pawh hian open heart surgery atana Surgery Team, Anaesthesiology Team leh nursing leh midangte inbuatsaihna tha a tiin, fakawm a tih thu a sawi a. Damdawi in hotute pawhin lung zai hi an ngaihven a, ngun takin an vil reng a ni.