Mizo History kimchang taka chhui tum

Mizo History kimchang taka chhui tum
Mizo history kimchang taka chhui tuma hmalak mek a ni tiin Art & Culture minister C. Lalsawivunga chuan Pachhunga University College-a Mizo History Association conference cum seminar-ah December 5, 2024 khan a sawi. Minister hi annual conference cum seminar hawnna inkhawmah khuallian a ni.
Mizo history ziaka awmah hian thil \henkhat kimchang lo deuh awm nia a hriat thu minister hian a sawi a, mi hmasate fakawm a tih rualin ziaka hmuh tur awm vak lo thil \henkhat chu chhui chian leh ziaka dah ngei \ul a tih thu a sawi.
“Kan Sailo lal zinga thlangtla hmasa Laltuaka te chanchin te hi ziakin hmuh tur a tlem a,” tiin minister chuan, “Pachuau, Fanai, Hualngo lalte pawh kan nei ve a, an chanchin ziaka hmuh tur a awm mang lo,” a ti.
Kimchang taka history ziak a nih theih nan leh history chhuituten harsa lutuk lo a, history hmun pawimawh an tlawh theih dan tur ngaihtuah te a rilruah chuan a awm thu a sawi.
Mizo history chhuina atana sorkarin hma a lak thu leh Delhi-ah an bawhzui thu sawiin, “Nuai 200 te a awm theih chuan historian-te tan pawh history hmun pawimawh tlawha zinte pawh harsa lutuk lo turah kan ngai,” minster chuan a ti.
Mizo History Association (MHA) annual conference cum seminar-ah hian Mizo history chhuitu hriat hlawh tak Liandova, Letpanchaung, Myanmar chuan “Lusei Hnam Kalphung Chanchin” tih thupuia hmangin special lecture a pe a, an pawl president Prof. Sangkima’n “Contributions of R. Vanlawma (1915-2006) to the People of Mizoram” tih thupui hmangin Presidential Address a nei bawk.
MHA hi 1980-a din a ni a, kum tin khawmpui neih pahin seminar an nei \hin a, Annual Conference cum Seminar tiin an vuah a, kumin hi a vawi 44-na a ni. Kuminah hian Mizo history chungchangah paper 25 an zirho dawn a, December 6, 2024-ah thleng a awh ang. Seminar -a paper hrang hrangte hi Historical Journal Mizoram tiin a bua chhuah leh thin a ni a, nikuma an paper dahkhawmna Historical Journal Mizoram, Volume XXIV chu khuallianin a tlangzarh a ni.