Mizo hlaah KRAWS langsar

POST NEWS SERVICE

Mizote thu leh hlaah Kristiannain hmun pawimawh a chang a, hlaah bik phei chuan Kristianna hi a langsar lehzual ang. A AW B awm hnua hla hmasate kha Kraws leh a chhehvel lanna, hmun pawimawh a channa a ni nghal.
“Kan hla phuahtu hmasate khan Isua tuarna lam kha an tuipui a, an hlaah pawh kraws leh Kalvari tlang kha a langsar a. Vawiin thlengin hlaah hian heti lam hi kan la hawi niin ka hria,” Prof RL Thanmawia chuan a ti.
Mizo poetry chungchanga PhD zo hmasa ber Prof RL Thanmawia hian Mizo hlaah Good Friday laia sak inhmeh a tam thu a sawi a, “Hnam dang Kristiante hian Easter lam an tuipui a, keini hian Good Friday kan tuipui tiin a sawi theih,” a ti.
Mizo mipuiin Isua tuarna lam an tuipui hrim hrim thu a sawi a, “Mizote hi mi vanduaina tuarpui thin kan ni a, vawiin thlengin chhiattawk an awm pawha inthutpui hmur thin kan ni a, thutna kan chang lo ang tih hre chung pawha mi kawmkara thu tur pawha kal thin kan ni. Chuvang te chu a ni ang, Isua tuarna hi keimahni-ah a tla na a, a tuarna lam hi kan tuipui,” a ti.
Kristian nih hnu-ah Good Friday hi mi rilruah a tla na nghal tih a sawi a, tun hma deuhah phei kha chuan Good Friday-ah hian mitthi dar te an vua a, Pulpit leh Maicham pawh puan dumin an khuh a, Isua an sun thin tih sawiin, “Chu chu kan hlaah hian a lo lang a ni,” a ti.
“Kraws leh Kalvari tlang, Isua tuarna hian kan rilru a khawih a, kan hla phuahtute rilru a khawih a, chu chu an hlaah a lo lang a. Vawiin thlengin, thangtharte hlaah pawh Isua tuarna lam hian hmun pawimawh a la chang,” a ti bawk.