Mizo mipui tanrualnaah lawm

MNF party leh Congress party chuan Manipur Zofate thlavang hauhna kawngzawhah Mizoram mipui tanrualnaah lawmawm an tih thu an sawi.
MNF Gen. Hqrs. thuchhuak chuan Zoram hmun hrang hranga “Zohnahthlak unaute thlavang hauhna kawngzawh” hlawhtling taka neih a ni chu lawmawm a tih thu a sawi a. Mizo mipui tanrualna chuan Manipur sawrkar leh India sawrkar a auh ei ngei a duhin a beisei tih a sawi.
He kawngzawhah hian Mizoram chief minister, MNF president Pu Zoramthanga, deputy chief minister Pu Tawnluia bakah minister leh MLA rualte pawh an tel tih a sawi a. Zofa hmun hrang hranga chengten harsatna tawka an ‘inpui’ an rawn pankhawm mek lai hian, inpui nih zo taka Mizoramin tlin taka unaute kan lo dawnsawn dan chu MNF chuan lawmawm a tih thu sawiin, ‘Zofaten insuihkhawm lehna kawng zawh zel ang u,’ a ti.
MPCC thuchhuak chuan NGO Coordination Committee hmalakna ‘Sakhaw Zalenna Humhalhna & Zohnahthlak Unaute Thlavang Hauhna Kawngzawh’ tihlawhtlingtute chungah lawmthu a sawi a. Aizawl leh Mizoram hmun hrang hranga mipui zawng zawng chungah a lawm tih a sawi.
‘Kan ram, kan hnam leh kan sakhua humhim tura theihtawpa tangho zel turin Mizoram mipui kan sawm a. Kawng zawha kal Mizoram mipui leh awmhmuna thlawpna petu zawng zawng chungah lawmthu kan sawi a. Kan unau nekchepa awm mek Manipur amite, Bangladesh amite leh Myanmar ami harsatna tawkte tan Congress party chuan theihtawp a chhuah zel dawn a. Hemi kawnga hma latute a thlawp zel dawn a ni,’ a ti.