Mizo naupang 5-in huaisen chawimawina dawng dawn

Indian Council for Child Welfare-in kumtina ram puma naupang, midang nunna chhanhima chet la thinte hnena huaisen chawimawina a hlan thin chu kuminah pawh hlan a ni leh dawn a, Mizoram atangin mi 5-in he chawimawina hi an dawng dawn.
Thudawn danin, ICCW Bravery Award for Children dawng tura Mizoram atanga thlante hi – Ramropuia (14) s/o Lianzami, Thenzawl Venghlun (A thianpa tuitla chhanchhuaktu); Zosangpuii (15) d/o Zodingliana, Ruantlang Mualveng (Apa electric current man chhanchhuaktu); Lalhmingsanga (19) s/o Zaithangpuii, Kanghmun South (maupang kum 3 mi lirthei lir atanga chhanchhuaktu); Lalrinmawia (16) s/o Lalrotlinga, Sialsuk Babu Veng (A thianpa tuitla chhanchhuaktu) leh Lalhriatzuali (18) d/o R Vanlalsawma, Thenzawl Hmar Veng (A unaupa electric current man chhanchhuaktu) te an ni a. Chawimawina dawng tur zingah kum 18 leh a chunglam an awm chhan hi, thil thlen hun lai hian kum 18 an la tlin loh vang a nih thu dawn a ni.
Chawimawina hi kumin Republic Day New Delhi-a neiha hlan tur an ni a, Jannuary 25 hian New Delhi panin an chhuak anga, February 1-ah Mizorama lo let leh tura beisei an ni.