Mizo nula thi-in chhar

Delhi bul Noida-a awm Debbie Vanlalhlimsangi (28) Keifang Venghlui chu February 19-a a chin hriat a nih loh hnu ah a ruang chhar a ni a, a ruang hlawmtu an awm loh avangin an lo halral tawh tih sawi a ni.
Pathianni chhuak chanchinbu Zalen ziah danin, Debbie Vanlalhlimsangi hi Qnet company-a thawk thin niin, tunhnai khan Bangalore-a company danga thawh tumin a bang a, February 22 tlaia chhuak turin flight ticket a la a ni.
February 18 zan khan Noida-a a thiante nena chaw eiin an chhuak ho a, February 19 khan a chanchin hriat zui a ni ta lo. February 20-ah a thianten Delhi-a police station pakhatah FIR an thehlut a. February 22 khan Keifanga a chhungte chuan Saitual Police Station-ah report-in, addl. SP J Rokima chuan Saitual SP Pukraj Kamal IPS, tuna Delhi-a chawlh hmanga awm mek chu bepawpin, ani hian a lo bawhzui a. Hemi tlai hian a thianten FIR an thehluhna ni lo, police station dang huamchhunga ruang chhar, darkar 72 chhunga a ruang hlawmtu an awm tak loh avanga an lo halral tawh chu a nih ringin CCTV atangte in an enfiah zui a, Debbie hi a ni ngeia ngaih a ni ta a ni.
A thih chhan hi hriatchian theih ni rih lo mah se, a kawng kan tur lirtheiin a su a nih rinna a awm a ni.