MIZO PIPU NUNA PATHIAN CHUNGCHANG

Upa Dr. Lalzuia Colney
Lower Kanan, Aizawl
Ph no. – 9862334371

Kumin (2023) Presbyterian Kohhran Puitling Sunde Sikul zilaibu-ah khan, No. 21-naah ‘Mihringah Pathian hriatna a awm’ tih thupui hmangin kan zir a. A tawp sawihonaah khan No. 1-naah, ‘Mizo piputeah khan Pathian hriatna a awmin kan hria em? tih sawiho tur a ni a. He thu hi sawifiah vek dawn chuan Biak in chhunga mipui hriat atan chuan fel lo chin a awm thei a; chuvangin he thupui hian sawi a hlawh vak lem lo mai thei. Chuvangin, Nitin Chanchinbu lamah hian sawi ta ila a fiah thei zawk mai awm e. Biak in pawnah chuan tawngkam pawh a zalen thei deuh zawk awm e.
Kan pipute hunah khan Pathian chu an be teh meuh mai. Tuna keini Pathian biak nen chuan a thuhmun thei kher lo vang. Kan pipute khan Mizorama Missionary lo kal hma daih atang khan Pathian chu neiin an be ve tho a. Keini Kristian Pathian nen chuan a thuhmun chiah tawh lo a ni. Kan pipute Pathian biakah chuan hmeichhia leh mipa a awm a, nu leh pa an awm a, pa chu SA an ti a, nu chu Khuanu an ti. Kan pi pute hunah chuan thihna an tawh pawhin an Pathian Pa emaw, Nu emaw an pawi khawih angah an ngai a. Chutih hun lai chuan nupa tuak khat chuan fapa an sun a, chuta an tah hlaah chuan,

Ka Sa maw nuar ka chuninu,
A, I emaw kan sual e,
Ka tuai duh lai chawnbanah an kai….

tiin tah hla an chham a ni.
A leh I pawh hi Pa nge Nu zawkin kan pathian pawi kan sawi, an tihna ang a ni thei ang. Tichuan, Mizoramah Missionary an lo chhuah hnuah chuan Sa leh khua kha la kawpin SAKHUA an ti ta niin a lang. Hetiang hian kan pipute hunah khan Pathian chu an lo nei ve ngei a ni, tih a lang. Amaherawhchu, Kristian nih hnua kan Pathian nen chuan a inang thei lo a ni. Kan zirlai sawiho tur chhannaah hian, kan pipute khan Pathian chu an lo nei ve ngei a ni tih a lang.
Mak ve tak chu, kan pipute khan thih hnuah an thlarau chu a awm ve zel tho va, an thlarau awmna chu Mitthi khua an ti a ni. Chutah chuan mitthi thlarau zawng zawng chu an kal veka, kawtchhuahah chuan mitthi thlarau fiahtu Pawla a awm ve tlat mai.
Keini Paula nen chuan a thuhmun lo tih chu kan hria ang. Amaherawh chu, engti zawngin nge, khawi atangin nge Pawla tih hi an neih ve tih chu kan sawi mai thei lo. Tichuan, Pawla chu mitthi khaw kawtchhuahah chuan mitthi thlarau lo fiah turin a lo duty a, Thangchhuah nu leh pa te, nula tlangval ngai leh tlangval nula ngai tawh chu a lo fiah vek a. Thangchhuah nu leh pa thlarau leh nula leh tlangval ngaih nei lote chu Pawla chuan sairawkher lianpuiin a lo sai tawpa, mitthi khuaah an kal ta a. Thangchhuah nu leh pa leh nula tlangval ngaih nei chu Pialralah an kal ta a, chutah chuan hnathawh a ngai ve tawh lo va, faisa ringin an awm der der tawh mai a ni tih hi kan pipute rin dan chu a ni.
Nula leh tlangval ngaih neite chu Pawla chuan a sai ve lo va, an hlaah pawh,

Di nei lo Pawlan a sai an ti,
Fam mah ila min sai bil tawh hlei lawng e,
Ka nemrang puantial ka di zawnna,

an ti ta a ni. (Pastor Challiana, Pipu Nun, p.34). Hetiang hi kan pipute Pathian rin dan chu a ni.
Kumin (2023) Sunde Sikul Zirlaibu han sawi takah chuan a dang pawh han sawi kai ta ila. Kan zirlaibu hi a thain bengvarthlak tak tak a awm a, lehkhabu tha tak a ni. A ziaktu pawh hi mi thiam, Theologian a ni tih kan hria. ATC lamah pawh an zir hnu vek a ni ang. Amaherahchu, a zirtu minaran (Layman) -ho zir atan chuan a fuh ber em aw tiin a thlir theih. A chhan chu Sunde Sikula zirtute hi mifel leh thiam tak tak an tel ve laiin, thenkhat chu mimawl, pitar leh putar te an ni a, chumi bakah thalai Bible pawh chhiar ve ngai lo, nu leh pain inkhawm tura an tirh luih vanga inkhawm leh piantharna pawh la nei ngai lo te, lehkha lamah pawh zir sang lo, CH pawh pass lo an tih angte nen hian an ni nuk a. Chutih lai chuan kan zirlaibuah hian Pathian awm ring lo, mithiam tak tak ziak ni si hi Pathianni vawi 9 lai kan zir a ni. Heng mite tan chuan Pathian hi a lo awm lo tak tak a ni ang tih mai pawh a awl thei a ni. Sunde Sikul hi an kal kim loh phei chuan Pathian hi a lo awm tak tak lo a ni tih hi an ring thei hial awm e. Amaherawhchu, Pathian a awm thu hi an zir zawm ve ngei erawh chu a ngai ngei ang.
Hetiang hian ngaihdan awm thei a ni a, a pawimawh ber chu Zirlaibu ziaktu hian a zirtu turte dinhmun ngaihtuaha zirlaibu hi ziak tur a ni. Layman tana zir tur chu ATC lam zirtu nen chuan level thuhmuna ngaih loh hram hi a tha ang. Chuvangin, Sunde Sikul Zirlaibu hi Layman zir tur a ni a, a phu tawk hi ngaihtuah tel ve a tha a ni.