Mizo Tawng

Tun hnai khan Chief Minister Pu Lalduhoma chuan hnam inpumkhatna atan hnampual tinin mahni tawng theuh humhalh chungin inpawh taka kan awmna turin tawng thuhmun (common language) hman theih a tul tih a sawi a. Mizo tawng tihhausak zelna kawngah Mizo hnampual tawng leh thumal sengluh a pawimawh tih a sawi bawk.
Tunhma deuh khan, Zohnahthlak zawng zawng huap tur hnam hming dah dan turah inhnialna a awm thin a. |henkhatin Zofa, tih te, Zomi tih te, Zo, Mizo tih te leh thildangte pawh. Kha inhnialna lo chhuahna kha chu, kan hriat angin United Nations-in tualchhuak hnamte dikna chanvo a puan (UN Declaration on the Rights of Indigenous People) behchhana Zohnahthlakten rorelna pakhat hnuaia inrelbawlna kan neih hunah ram luahtu hnam hming (name of nationality) atan eng nge tha ang tih sawina (discussion) atangin a ni.
Eng pawh ni se, hetiang sawihona neih hi thil pawimawh tak a ni a, sawihona atangin thil dik zawk leh tha zawk a lo chhuak zel ang a, engtikah emaw chuan a la fel ve mai awm e. Chutih ruala thil pawimawh tak pakhat chu, rorelna pakhat (sovereign state) hnuaia inrelbawlna hran neia Zofate kan la kun hma pawha thil pawimawh ber pakhat chu ‘Inpumkhatna’ hi a ni.
Inpumkhatna nei tur chuan inhriatpawh tawn a pawimawh a, chuta tana hmanraw pawimawh ber mai pakhat chu ‘tawng’ hi a ni. |awng a pawimawhzia chu Bible-ah Babel in sang sak chanchin atangin a hriat vek tawh a nih kha.
Mizoram hi khawvel hmun hrang hranga Zohnahthlakte insuihfinna hmun pawimawh ber a ni a, Mizoram pawn lama Zohnahthlakte pawhin ‘Zofate Jerusalem’ tia an sawi ber pawh a ni. Zofate Jerusalem-a tawng hman tlanglawn ber chu tuna kan hman mek Mizo |awng hi a ni a. Rorelna pakhat hnuaiah kan awm emaw, kan awm lo emaw pawh ni se, Zofate kan inhriatpawh tawn theihna kailawn pawimawh ber leh lian ber chu Mizo |awng hi a ni lo thei lo.
|awng chungchanga thuneitu Mizo Language Development Board te pawh a awm tawh a, he Board hian Mizo tawngin hma a sawn zawk dan tur a ngaihtuah mek a. Tuna chief minister sawi, tawng sengluh chungchangah, Zohnahthlak hrang hrangte tawng/thumal kan sengluh tam poh leh kan tawng hi a hausa mai dawn tihna a ni.
MLDB hian Mizo |awng thumal (vocabular) sengkhawm hna hi tunah hian a thawk mek nge? Chief minister thusawi atang hi chuan ‘tih mek a ni’ lam hi sawi rik tur a la awm lo niawm tak a ni a, CM pawhin duhthu a la sam vel mai mai a ni ber.
Zirlaiten tawng dik, tawng ziah dan dik, lamrik dan dik etc. an hriat theih nan chuan kaihhruaina anga zirlaibua seng luh thuai a pawimawh hle a. Tuna kan kalphungah hi chuan, Mizo tawng zirlaibua thu ziaktute Mizo tawng ziah dan inang lo nuaih hi zirlaite tan chuan a luhaithlak (confusing) dawn tih a chiang reng a ni.