Mizo tawng tih hausakna atan Mizo hnampual tawng sengluh chhin a tul – Chief minister
Mizo tawng tih hausakna atan Mizo
hnampual tawng sengluh chhin a tul
– Chief minister
Mizo tawng tih hausakna atan Hindi leh Sap tawng la chhawng loin Mizo hnampual tawng atanga thumal sengluh tam a tul tih chief minister Lalduhoma chuan a sawi.
Joint Hnampual Students’ Organisation (JHSO) bultumin Inrinni khan Aizawlah Joint Hnampual Meet 2026 neih a ni a. Chhun leh zanah hun hman niin, chhun lama hun hmanpuitu chief minister chuan, hnam inpumkhatna atan tawng thuhmun hman tlan a pawimawh a, Mizoramah hnampual tinin mahni tawng theuh humhalh chungin inpawh taka kan awmna turin tawng thuhmun (common language) hman theih a tul tih a sawi. Mizo tawng tihhausak zelna kawngah pawh Hindi leh Sap tawng la chhawng loin, Mizo hnampual tawng leh thumal sengluh chhin a pawimawh tih a sawi a ni.
Meet thupui, “Zofate kan ni, inen hrang thei kan ni lo” tih chu a taka nunpui a pawimawh tih a sawi bawk.
Sawrkarin minority-te a ngaihsak tih chief minister hian sawiin, minority-te sawmna pawh a ngaipawimawh a, a rem chuan a tel zel tih a sawi a. Kut hrang hrang – Bawm Students’ Association huaihawta kum kalta October 1-a Khawmawia neih Tlanglut Kut, Saipuma Hmar Students Association buatsaih Sikpui Ruoi, Vathuampuia Pang Zirlai Pawl buatsaih Naumariamlak Kut, zirlai pawl leh Thangram Indigenous Tribal Movement buatsaih Thangram Cultural Meet leh tuna Meet-ah a tel tawh tih thu a sawi.
Mizorama chengte inngeih taka kan chen theih chhan pawimawh tak chu hel pawl awm lohna state a nih vang a ni tih a sawi a. State ralmuang taka chantir tumin sawrkar chuan theihtawp a chhuah a, kumin April 30 khan hnampual hel pawl awmchhun HPC (D) Lalhmingthanga Sanate Faction chuan ralthuam tungin, Mizoramah hnampual hel pawl awm tawh loin, remna leh muanna a tak ramin a thleng a. Hel pawl awm lohna state nihna hi chhawmnung zel a ngai tih a sawi ni.
“Zofate inpumkhata kan awm a pawimawh a, mahni hnampual zia, culture leh tawng chhawmnung zel chungin inlungrual taka indaidanna leh inlakhranna awm loa chenho zir a tul,” Lalduhoma hian a ti. Hnam sulhnu (history) ngaipawimawh a, a theih ang zela ngaihven leh zir turin a chah.
State pakhat emaw bial pakhata majority emaw minority nih thiam a pawimawh tih sawiin, “Lungawi taka awmho theihnan kan sir amite mitmei veng reng chunga kal kan zir a ngai a ni,” ti.
Meet-ah hian adviser to chief minister (Political) Lalmuanpuia Punte MLA leh Central YMA vice president Prof. Lalnuntluanga pawhin thu an sawi bawk.
Joint Hnampual Meet buatsaihtu JHSO hi hnampual zirlai pawl hrang hrang – Mizoram Bawm Students Union, Ranglong Student Union, Hmar Student Association, Pang Zirlai Pawl, Siamsinpawlpi, Lai Student Association leh Mara Student Organisation inzawmkhawm an ni.