Mizo tawngin mitdel tawng lamtawi siam
Mizo tawngin mitdel tawng lamtawi siam
SCERT (State Council of Educational Research and Training) buatsaih Mizo tawng Braille lamtawi (Braille contraction) leh Indian Sign Language hmanga Mizo thumal 365 awmna video chu Thawhtanni khan Education minister Dr Vanlalthlana’n a tlangzarh.
Minister chuan mitdel hawrawp lamtawi leh standard Indian sign language chu Mizorama zirna hmasawnna kawngah mellung pawimawh tak an nih ngei a beisei tih a sawi a. Sawrkar ang pawhin Vohbikte chu an ngaihsak hle nia sawiin, National Education Policy (NEP) 2020 phut angin ‘special education’ chu an ngaihpawimawh zel tur thu a sawi. Chutiang lama sawrkar hmalakna thenkhat sawiin, school tam takah wheelchair hmanga rualbanlo zirlaite an chet ve zung zung theihna turin railing siam a ni tih a sawi a ni.
Mizorama special school hrang hrang – Ephatha Special School for the Deaf and Hard of Hearing, Redeem Garden School Leitan leh Special Blind School Durtlang naupangte atangin zai leh lam ngaihthlaka thlirho a ni.
He huna tel State Commissioner for Persons with Disabilities Vanlaldiki Sailo chuan India rama rualbanlo zingah beng lama harsatna nei an tam ber avangin sawrkar inkhawm pawimawh apiangah sign language telh zel tur a ni tih a sawi a. Rehabilitation Council of India chuan sign language professional-a a pawm mi pasarih kan nei tawh tih a sawi. A ni bakah hian Mizo Braille-a awm theihna tura hma la hmasa commissioner Lalkiamlova, Mizo Standard Braille contraction buaipuitu zing atangin Govt. J Thankima College asst. professor Lalbuatsaiha ten thu an sawi a ni.
Mitdel hawrawp hi international standard size a nih avangin hawrawp pangngai anga duh ang anga lian leh tea ziah danglam theih a ni ve loa, ziak leh chhiar chhung a reiin, lehkhapuan pawh hman teuh a ngai thin. Mizo tawnga Braille hmangtuten awlsam leh rualkhai zawka an hman theih turin SCERT hian Mizo tawng Braille lamtawi (Braille contraction) hi a buatsaih a ni.
India rama sign language hmangtu special school leh a dangte ‘sign’ hman dan a inang lo hlawm a. Hei hi SCERT chuan a vei bakah NEP 2020 chuan India ramah sign language angkhat hmang tura a tih bawk avangin, Mizo tawng thumal 365 hmangin he sign language video hi siam a ni.