MIZO THLA HMING VUAHCHUNGCHANG

Last updated Jul 28, 2025 19 0
Dr. Lalzuia Colney
Ph. No. 9062334371
Mizo thla hming vuah dan hi hriat dan leh sawi dan a inang lo nual a, chu chu tun tumah hian sawi rem theih tum ta ila. Tun tuma kan sawi tur hi Mizoram sorkarin Official taka a pawm a ni a, chu chu kan hriat theuh a pawimawh khawp mai. Mizo thla hming vuah dan hi Mizo chi peng hrang hrang leh chenna hmun hrang hrang (Regional Variation) a awm vang pawh a ni thei a; chutih lai chuan Mizo chi peng hrang hrang pawh Mizo hnahthlak vek kan nih avangin hruikhat kan vawn a tul a, chumi hre reng chuan September 8, 2011 khan Information & Public Relations, Goverment of Mizoram chuan I&PR Auditorium-ah chi peng hrang hranga kum upa te, MUP hruaitu te leh NGO hruaitu dang MHIP te, MAL lam te, MWA lam te, etc. a sawm khawm a, chutah chuan mi rintlak tak tak kum 100 lai ni tawhte pavh an tel a ni. Chumi tuma sawiho hlawh tak chu July thla hming hi Vawkhniak-zawn-thla, Vawkhniak-zawm thla, Vawkhniah-zawn thla tih te, Thitin chungchangte hi a ni ber a.
Hemi tuma chi peng hrang hrangte pawhin zaikhata an pawm tak thla chu VAWKHNIAHZAWN THLA tih hi a ni. Hei hi chi peng thenkhat chuan Vawkhniakzawm thla tih te, Vawkhniakzawn thla tite an awm a. Hemi chungchang hi Pu Pabuanga, Mizoram Kristian nih hmaa sakhaw puithiam sawi dan chuan VAWKHNIAHZAWN THLA a ti a. Pu Pabuanga hi Pu JF Laldailova nupui Pi Thangzawni pa a ni a, Pu JF Laldailova pawh khan a Mizo tawng lakna hnar ber a ni hial a ni. Chuvangin, hemi tum hian July thla chu VAWKHNIAHZAWN THLA tih chu lungrual takin an pawm ta a ni. Chutichuan, Kohhran pawl hrang hrang Synod leh Mizoram sorkar pawhin July thla chu VAWKHNIAHZAWN THLA tiin an dah ta a ni.
Hemi tuma inrawnkhawmnaah hian tihdanglam awm chu Kawlriaua pa Thitin tih kha, Kawlriaua pa hian nupui a sun a, thla thum a ral hma chuan midang neih hi thiang loa an ngaiha nih avangin thla thum a tlin hmain Thitin a hmang a. Thitin awmzia chu September thla hi Mimkut a ni a, Mimkutah chuan mitthi thlarau kha an lo tel vekah an ngai a, chu chu Mimkut zawh hi a ni a. Chumi hma chu Kawlriaua pa hian a nupui sun thla thum hmain THI|IN a lo vuah ve ta a, chu chu pawm a ni lo. Hemi tuma sawihonaah hmar lam unaute chuan keini chuan Thlazing kan ti asin an ti a. Chu chu an pawmpui ta a, August thla chu Thlazing an ti ta a ni. Hemi bakah hian Rolura Mimkut tihte a awm a, chu pawh chu hman a ni lo. 
Tichuan, hemi tuma mi hrang hrang rawn tlaka an ngaihten an thutlukna chu hetiang hi a ni. January thla chu Pawlkut thla, February - Ramtuk thla, March - Vau thla, April - |au thla, May – |omir thla, June - Nikir thla, July - Vawkhniahzawn thla, August -Thlazing, September - Mimkut thla, October - Khuangchawi thla, November - Sahmulphah thla, December - Pawltlak thla tihte hi a ni. Hetianga mi rawntlak sorkarin a sawmte thutlukna hi Mizo Calender siamte chuan an pawm vek a, amaherawhchu, he thutlukna hre lo, Private Press thenkhat chuan an tihdan pangngai khan Calender an siamah an la dah ta zel a, hei hi a pawi khawp mai. Zirlai Exam-naah Mizo thla hming sawi tur ni ta sela, hemi tuma sawi ang thutlukna hi an zawm loh chuan mark an hmu dawn lo a ni
Mizo tawng han sawi takah chuan, tun lai hian mi thenkhat Mizo tawng chik tak taka hmang an awm a. Mizo tawng han sawi takah chuan tlem han sawi ila. July 8, 2025 Vanglaini chhuakah khan Pu R. Lalmuanchhana khan thu tha tak tak leh pawimawh tak tak a rawn ziak a, chumi zinga a sawi pakhat Mizo tawng kan Modify leh Modify loh hi a rawn sawi fuh lo deuh a. Ani chang lo midangte pawhin pawm thiam lo an awm nual a, chu chu ZIAK tih hi a ni. Verb leh Adjective thenkhat chu kan Modify ve loh a awm tho, chu chu ZIAK tih hi a ni. Mi thenkhat chuan ZIAH an ti fo mai. Mahse, Mizo tawng thaah chuan ZIAK hi ZIAH an ti ngai lo, eng MOOD-ah pawh ZIAK a ni ngar ngar a ni. Kan Bible pawh kha han en ila, Johana 19:22-ah chuan, Pilatan, “Ka ziak kha ka ziak zo tawh”, tiin ZIAK an modify ve lo. Eng Mood-ah pawh ZIAK a ni ngar ngar a ni. Pu R. Lalmuanchhana khan a article-ah khan ZIAH tih hi vawi 41 a hmang a ni. Ziah modify-na chu ZIAT tihah hian a ni. “Zawngtah ka ZIAT a, ka ziah zawh hunah kan ei ang”, tih ah hiah ziah hmanna chu a ni. Eg: ZIAT - ZIAH.
Heng bakah hian Mizo tawng tihdik tum lutuk hian tihsual an nei fo mai. Mizo tawng hi a Literal Meaning anga tihdik tum chuan an fail fo thin. |awng a ni tih hi hriat tur a ni. Entir nan Ketaminu pawh a pa pawh Ketamipa kan ti ngai lo. Hetiang zel hian infiamna KAWI pawh a bial a ni. Khanchhuk pawh a phei thei ang bera kham a ni. Thaichhawninu pawh a pa a awm tho. Chingpirinu pawh a pa a awm tho. Hetiang hian Mizo tawng hi tawng a ni a, Literal Meaning anga tihdik tum chi a ni lo. Ekchhuak te, zunchhuak te, luakchhuak te hi a chhuah hmain chhuak kan ti vek. Heti chin hi duhtawk rih ila.