Mizo tleirawlte an champion ta!! India rama SAI Hockey Training Centre tha ber STC Thenzawl

Mizo tleirawlte an champion ta!!
India rama SAI Hockey Training Centre tha ber STC Thenzawl
Bangalore khawpuia khelh zawh tak All India Inter SAI Women’s Hockey (Under-16) Championship 2025-ah Mizoram (STC Thenzawl) chu a vawi hnihna atan an champion leh ta!!
October ni 6-11, 2025 chhunga khelh zawh tak he tournament-ah hian Mizoram chu pool D-ah STC Haryana leh STC Badal (Punjab)-te nen awmin, an match hmasa berah Haryana chu 5-0 teh meuha an hneh hnuin, an match hnihnah STC Badal (Punjab) chu sikhat faiin an hneh leh bawk.
Quarter final-ah hian STC Ranchi (Jharkhand) nen inhmachhawnin, Mizo tleirawlte hian 3-1 hnehna an chang leh a; semi-final match-ah hian STC Hissar (Haryana) nen insuin, hetah pawh hian 4-3-in an chak leh.
Final match hi kar liamta Inrinni khan STC Sundargarh (Odhisa) nen an khel a, hetah hian Mizoram hian 3-1 hnehna changin an champion ta a ni.
Final-ah hian first quarter leh second quarter chu khawi lam mah mah goal inpe loa an tluan hnuin, third quarter an tan chauh tihah Mizoram jersey no. 17 Malsawmzeli chuan Mizoram goal khatna a rawn khung a; chu goal chu STC Sundargarh lamin rang takin an rawn chhanglet ve leh nghal a.
1-1-a an in-draw hnu hian jersey no. 3 K. Vanlalpeki chuan Mizoram goal hnihna a rawn thun ve leh a; 2-1-a hma an hruai hnu hian Mizoram chakna tichiang turin jersey no. 17 Malsawmzeli bawkin Mizoram goal thumna chu 4th quarter-ah a rawn thun leh ta a ni.
Final match-ah hian K. Vanlalpeki (Apektei), Durtlang Mualveng chu he tournament chhunga a vawi hnihna atan ‘player of the match’ atan thlan a ni.
He tournament-a player of the match-a tum hnih thlan tawh tho Mizoram jersey no. 14 Laldinpuii (Puipuii) Durtlang Mel 5 chu ‘player of the tournament’ atan thlan a ni bawk.
Hockey game-ah hian kan tleirawlte leh kan nulate hian an coach-te thahnemngaihna azarah theihna an neih sanzia hi an tilang ngun ta malh malh khawp mai a, thuneitute leh thiltitheite tan pawh ngaihsak mai bakah duhsak hi an phu hliah hliah a ni tih hi an thiltih hmang hian an entir hnem ta khawp mai.
Sawrkar mai bakah mipui leh media lam thlengin an phu tawk chawimawina leh nawrpui an tulna zawn lam thlenga Mizoram hockey game hi kan ngaihvenpui a hun hle tawhin a lang.

Mizoram (STC Thenzawl) squad

Goalkeeper:
1. Rochanlui Durtlang

Defender:
1. Ladinpuii Durtlang
2. Lahriatpuii Champhai
3. Lalrintluangi Durtlang
4. Dorothy Lalbiaktluangi Buarpui

Midfielder:
1. Manglawmsangi Durtlang
2. Esther Lalremruati Ramlaitui
3. Lalthakimi Thenzawl
4. Remruatpuii Kolasib
5. Amy Lalrempuii Rotlang West
6. Lizia C. Lalchhanchhuahi Rotlang West

Forward:
1. C. Lalruatsiami Zobawk
2. K. Vanlalpeki Durtlang
3. Lalvenpuii Thenzawl
4. K. Lasiamthari Durtlang
5. C. Malsawnzeli Durtlang

Coach: Defender Malik, Haryana (SAI coach)
Manager : Lalzawnchhungi, Durtlang (NIS coach, Directorate Sports & Youth Department)