Portugal leh Spain an chak tluang zel

Europe khawmual atanga World Cup 2026 khel tur zawnna neih mekah Portugal leh Spain an khel tha chhunzawm a, vawi thum an chak zawn tawh. Football ram lian pahnihte hian World Cup 2026 khelh ngei tumin hma lam an pan zel.
Portugal chakpuitu Neves Group F hmahruaitu Portugal hian an group ah point khat chauh la hmu Republic of Ireland an mikhual. Lisbon khawpuia Estádio José Alvalade muala inkhel hmuhnawm takah Portugal hi an chak zo lo teuh hle a, hun pek belha Reuben Neves goal thun hmangin an chak hram a, harsa takin point thum an hmu.
An mualah chak ngei tuma inlan Portugal hian an mikhualte an nawr nasa hle. Goal thun tum viau mah se an hlawh tling mai thei lo va, goal awm lovin chawlhlawk an hmang phawt.
Chawlhlawk hnu lamah Protugal an khel tha chhunzawm a, goal thun theihna hun remchang pawh an hmu thuai a, penalty an hlawhchhuak. Penalty hi Cristiano Ronaldo chuan a pet naa Republic of Ireland singhak Caoimhin Kelleher chuan fuh takin a lo dang tlat thung. Kelleher penalty save vangin an phur zui viau a, Nations League champion lakah him tluan tumin tan an khawh zui nasa hle a, hun pangngai tawp thleng chu an invenghim thei.
Republic of Ireland in point hlawhchhuah ngei tuma tan an khawh laiin Reuben Neves a inlanlar a, goal a thun. Neves hian minute 90+1-ah Francisco Trincao cross tha tak chu fuh takin a tauh goal a, hmahruaina goal a thun. Neves goal thun hmangin Portugal hian hnehna an chang zui a, point thum an hmuh belh.
Group F-a inkhel dangah Hungary chuan an mikhual Armenia chu 2-0 in an lo hneh a, point thum hlu tak an hmu. Hungary tan hian Daniel Lukacs leh Zsombor Gruber ten goal khat ve ve a thun. Group F-ah hian vawi thum chak zawn tawh Portugal in point 9 hmuin hma an hruai chhunzawm a, point li hmuin Hungary in an dawt. Armenia in point thum an hmu tawh a, Republic of Ireland in point khat chiah hmuin table mawngphah an luah chhunzawm thung.
Spain pawh an chak zel
Inrinni zana inkhel dangah team lian Spain in hnehna an chang a, Group E-ah vawi thum an chak zawn ve ta chiah bawk.
European champion Spain hian point thum hmu tawh Georgia chu Martínez Valero-ah an mikhual. An mikhual lakah hian Yeremy Pino chuan minute 24-naah hmahruaina goal a thun. Hun rei tak chhung goal lut a awm belh theih loh hnuin Mikel Oyarzabal chuan minute 64-naah an goal hnihna a thun belh a, an hmahruaina a tizau. Oyarzabal goal thun hnu hian goal dang a luh belh thei tawh lova, Spain in an mualah hnehna an chang zui ta a ni.
Group E-a inkhel dangah Turkey chuan point la hmu lo Bulgari chu 6-1 ngawtin an sawp a, table-ah pahnihna an luah chhunzawm.
Vasil Levski National Stadium-a lenglut Turkey hian an khel tha viau a, inkhel tan atanga minute 11-na lekah Arda Güler chuan hmahruaina goal a thun nghak. Goal an chhuah atanga minute hnih hnu lekah Bulgaria in Radoslav Kirilov hmangin an si phurh an sut ve nghal. Hma takah goal hnih lut bawk mah se Turkey tan Viktor Popov, Kenan Yildiz, Zeki Çelik leh Irfan Can Kahveci ten goal an thun belh leh a. An mikhual Turkey ngam lovin Bulgaria an tlawm zui ta a ni.