Mizoram-a entrepreneur & skill zirna hmun din dan tur sawipui

Mizoram-a entrepreneur & skill
zirna hmun din dan tur sawipui
Entrepreneurship Development Institute of India (EDII) director general Dr Sunil Shukla chuan Ningani khan chief minister Lalduhoma a kawm a. Mizoram Entreprenuership Development Institute (MEDI) din dan tur a sawipui.
Chief minister hian rawtna an rawn neih chu a huamzauin department kaihhnawih a ngah hle a, zau zawka inrawnkhawm a tul dawn, tiin, Coordination Committee din a, chak taka bawhzui an tum dawn tih a sawi.
EDII hotu hian Mizoram sawrkarin hmunhma a pek theih chuan CSR fund an zawnkhawm leh central scheme atanga fund awm thei hmangin entrepreneur & skill lama hmeichhiate leh zirlai naupangte tan institute tha tak – MEDI an din thei dawn tih a sawi a. A tir lam kum 5 chhungin entrepreneurship, skill training, start-up, incubation leh mentoring lam an kalpui dawn a. Kum 8 vel chhunga mahnia campus nei theia din an tum zui dawn tih a sawi a ni.
EDII hi kum 1983-a din a ni a, Gandhinagar Gujarat-ah hmunpui neiin, state tam takah Entrepreneurship Development Centre an din tawh a ni.