Mizoram atangin Malaria umbo theih – Health minister

Malaria do kawngah mipui kan tan ho chuan kum 2025-ah chuan Mizoram atangin malaria a umbo theih a ring tih Health & Family Welfare minister Dr R Lalthangliana chuan a sawi.
Ningania District Hospital Lawngtlai a tlawhnaah Mizoram chu India rama malaria hluarna state zing ami a nih thu leh Mizoramah Lunglei, Lawngtlai leh Mamit district chu malaria hluarna a nih thu Health minister hian sawiin, heng district pathumah hian Malaria dona kawngah ngawrh zawka hma lak tuma ruahmanna siam a nih thu te, state sawrkarin theihtawp a chhuah bakah sawrkar laipuiah pawh hemi kawnga hma lakna tura mamawh hrang hrangte thlen a nih thu a sawi.
“Malaria dona kawngah mipui kan tan ho that chuan kum 2025-ah Mizoram atanga umbo theih a nih ka ring,” a ti a. Inzirtirna nasa zawk a awm theihna’n a theihna hmun apianga sawi darh zau a tul tih a sawi. Lawngtlai district chu hriselna lamah hmasawnna hmuh tur tam tak a awm laiin, tan lak ngaihna lai engemawzat a la awm tih a sawi a. Hriselna kawnga hma lak chu sawrkar leh thawktute chauh tih theih a ni loa, mipui nen tangruala hma lak a tul tih a sawi a ni.
Covid vangin sawrkar hna lakna tur hrang hrang khaihlakin, hna lak theih loh tam tak a awm thu minister hian a sawi a. Tun dinhmunah hriselna kawnga thawktu indaih lohna hnawhkhat tur leh hmanrua leh hmasawnna ruhrel tihchangtlun kawngah hma lak zel theih a beiseiawm tih a sawi bawk.