Mizoram buh tharchhuah dan

Directorate of Economics & Statistics chuan nikum kum tawp lam khan Mizoram ‘Statistical Handbook 2024’ a tichhuak a. Department thenkhat atanga information/data an hmuh tlai avangin handbook hi an tichhuak lawk thei lo a ni awm e. Tlai deuh tawh mah se, ‘Statistical Handbook 2024’ behchhana kum 2023 leh 2024 chhunga thingtlang lo leh leilet atanga Mizoram buh thar chhuah dan kan khaikhin dawn a ni.
Kum 2022-23 chhung khan thingtlang lo neihna zau zawng chu Hectare (Ha) 18,107 (Sqkm 181.07) a ni a, buh metric ton (MT) 22,053 tharchhuah a ni. Kum 2023-24 chhungin Ha 14,684 (Sqkm146.84) siam niin Buh MT 17,916 tharchhuah a ni.
Kum 2024-ah hian a hma kum aiin thingtlang lo neihna area hi a zim daih zawk a, Ha 3423 zetin a tlahniam a, chuti chung chuan, hectare khata buh tharchhuah zat hi kum 2023-ah 1.21 MT/Ha a nih laiin, 2024-ah chuan 1.22 MT/Ha a ni thung.
Leilet (WRC) atang hian, kum 2023-ah Ha 15,984 a zauah buh MT 35,783 tharchhuah a ni a. Kum 2024-ah Ha 9,931-a zauah buh MT 22,008 tharchhuah a ni bawk a. Hectare khat zela buh tharchhuah dan hi, kum 2023-ah hian 2.23 MT/Ha a nih laiin, 2024-ah chuan 2.21 MT/Ha a ni.
Heta tanga lo lang ta chu, leilet aiin thingtlang lo neihna a zau zawk zel a, hmun zim zawk leilet atanga buh tharchhuah hi thingtlang lo tharchhuah let thawk a ni zel thung.
Leiletah rau rau pawh hian, 2023-ah aiin 2024-ah Ha 6,053 zetin a zim zawk chungin, 2024-a buh tharchhuah hian 2023-a buh tharchhuah a zat thuak tho. Chumi awmzia chu, buh chinna hmun a zim sauh chungin, buh tharchhuah erawh a pung zawk hlauh thung.
Kum tin ramngaw zau tak tak thiat chunga buh kan tharchhuah aiin, kum tin a ngaia buh tharchhuah reng theihna leiletah buh kan thar chhuak tam zawk daih a, thingtlang lo tharchhuah let thawk leiletin a tharchhuak thei tihna a ni. Statistic atangin kan hmu a nih khi.
Ram hruaitute hian leileta siam theih ram hectare 50,000 chuang (tuna leileta siam mek tel lo hian) kan la nei tih an sawi thin a. Kum 2024-a buh chinna atana leilet Hectare 9931-a zau-ah, buh Metric Tonne 22,008 a thar chhuak thei a nih chuan, Hectare 50,000-a zauah chuan buh MT 1,10,700 a tharchhuah theih tihna a ni. Leileta siam theih hi hmang tangkai thei ila chuan, tuna kum khata kan thar chhuah let nga vel hi kum tin buh kan tharchhuak tawh dawn tihna a ni.
Buh ei hnam kan ni bawk a, kum a thar atangin Buh lam hi kan luhchilh nghal a pawimawh a ni.