Mizoram buh tharchhuah lei hi

Sawrkar thar hnuaiah kum 2024 atang khan Mizoram buh tharchhuah sawrkarin a lei chho ve tan a. Hriat theih chinah, kum 2024 Dec 19 khan Pangbalkawn, Kolasib-a Om Om Modern Rice Mill-ah Mizoram buh thar lei tanna programme kha hman a lo ni tawh a. Khami tum khan mimal, FPO te, PACS te leh Society hrang hrang atangin buhhum lei tur quintal 418 phurh khawm a ni a. Mizoram sawrkar chuan buhfai Kg-ah Rs 30 zelin a leisak thin dawn, tih a ni.
Nimina District Agriculture Marketing Committee (DAMC) Kolasib District thutkhawmnaah khan, kum 2025 chhunga Mizoram sawrkarin Mizoram buh tharchhuah a lei zat tarlan a nih dan chuan quintal 1472 a ni a, kum thar 2026-ah hian buhhum quintal 350 lei a ni leh tawh bawk a. Chuti a nih chuan, Mizoram sawrkarin kuthnathawktute buh tharchhuah a lei zat chu (buhhum) quintal 2240 tihna a ni. Buhfai rate hi Rs 30/kg a ni a, buhhum quintal 2240 atang hian buhfai engzat nge chhuak thei dawn hriat a ni mai lova, eng pawh ni se, Mizoram kuthnathawktute buh tharchhuah sawrkain a lei ve ta hrim hrim hi hmasawnna rahbi pawimawh tak chu a ni, kan ti lo thei lovang.
Thla tina Mizoram pawn atanga buhfai kan lei hi quintal 44,000 vel a ni a, chumi man atan chuan thla tin cheng vaibelchhe 15 vel a ral ziah thin niin FCS&CA report-ah hmuh a ni.
Mizoram economics & statistics buatsaih, statistical handbook 2024-a kan hmuh ang chuan, kum 2024 khan Mizoram buh tharchhuah chu metric tonne 39,924 (leilet+thingtlang) a ni. Kum khat chhunga Mizoram buh tharchhuah hi a vaiin sawrkar hian lei thei pawh ni se, thla hnih tla bak a ni chuang lova, Mizoram tharchhuah buh lei hi chuti taka ropui a ni thei lo. Mizoram hmun hrang hranga Buh thartute tan hian, rice mill panna senso leh buaipuina tur nen, sawrkar rate hi chuti takin a itawm hran lo. Rice Mill bulhnai deuha awmte tan chuan a zia deuh mahna.
Eng pawh ni se, tuna Mizoram buh tharchhuah let nga vel tal tharchhuak thei tura hma lak a pawimawh tih bawk atanga bul kan tan leh a ngai. Chumi atan chuan, sawi leh sawi hnu, leilet thar siam theihna ram awl tha hectare singnga zet kan la nei tih lah kan hre khiu khiau reng mai si a!!!