Mizoram chhangchhiat lai…

Thenawm ram Myanmar buaina hi kan hria mai pawh ni lovin, he ram buainain a nghawng tel ram (state) kan ni nghal bawk.
Refugee tam tak an lo lut a, India ram chu refugee dawngsawng thei lo ram a lo nih avangin, refugee-te thawn let zel turin India sawrkar chuan raltlan lo luh theihna state sawrkarte chu a rawn hriattir a. ‘Heng raltlante hi kan chipuite an ni a, keini chuan kan lo hnar thiang lo’ tiin sawrkar laipui thupek pawh zawm thei lovin Mizoram sawrkar chuan raltlante a lo tuamhlawm hlauh a. Chutiang bawkin Bangladesh atanga raltlante pawh a theih ang angin a lo tuamhlawm a. India ram state pakhat buai mek Manipur atang pawhin kan unaute lo tlanchhia an awm bawk a; Mizoram chu a chhangchhe hle a.
Mizoram a chhangchhiat zual em emna chu, raltlante rawn um tiautu ber Myanmar sipaite lehzelin an umchhuah raltlante tlankhawmna ber Mizoram chu tlanchhiat nan an la rawn hmang ve leh zel hi a ni. India sawrkar lah chuan refugee lo dawnsawn a duh loh laiin, refugee siamtu ber a lo dawngsawng mauh mai thung a, an ralthuamte nen lam an ram lama an kir leh theihna tur, rem leh rem lovin a buatsaih ve zel bawk a.
Chutih laiin, Myanmar sipai tlanchhiate thawn hawna tur thlawhtheihna chu niminah Mizorama airport awmchhun Lengpui airport-ah a rawn chesual ringawt pek a. He thlawhna chetsualna hian, ni khat chhunga Mizorama thlawhtheihna thlawk lut tur leh thlawk chhuak tur a rawn titawp vek a, zirlai, damlo leh sumdawng tam takin an tawrh phah a, sum leh pai, tha leh zung bakah hun hlu tak a ral hnem hle. A chhangchhiatthlak hle kan tih laiin, thlawhtheihna chesuala hliam tuarte damdawi in lam pan tur ambulance ber lah airport terminal building-ah a lo tâng rawl vei nen, nimin zet kha chu Mizoram chhangchhiat lai ber a nih loh pawhin, a dawttu a ni bik lo maithei. Heti hrim a nih chuan, India leh Myanmar hian free movement regime hi kan lo la mamawhin, tihtawp ngawt chi pawh a nih dawn loh hi, a tih theih awm e. Ramri hung chung pawhin FMR hi chu kalpui zel theih tur chi a nih hmel e.