Mizoram Cooperative Policy duan sawrkar laipuiah kan thehlut tawh – Cooperation minister

On May 26, 2026 0 0

Cooperative society-ten sawrkar atanga hamthatna an dawn theihna tur Mizoram Cooperative Policy an duan chu sawrkar laipuiah an thehlut tawh tih Cooperation minister PC Vanlalruata chuan a sawi.
Primary Agricultural Credit Cooperative Societies (PACS) zinga hnathawhna atana computer nena inthlunzawm vek tawh ho chu Thawhtanni khan an mamawh tur hmanrua (hardware) pek an ni a. Computerisation of PACS Project hi Ministry of Cooperation hnuaia centrally sponsored project kalpui mek niin, Phase-II ah hian PACS 24 computerise tura thlan an ni a, field verification tih zawh a ni tawh.
Hardware hi sawrkar thuchhuah dinglai angin GeM portal kaltlang veka supplier hnen atanga lei a ni a, tuna bungraw rawn supply-tu hi Saaj Venture Dimapur a ni. Item 10 – Desktop HP Pro Tower 280 G9, inverter, dot matrix passbook printer, HP laser printer, thermal printer, fingerprint scanner, barcode scanner, POS machine, webcam leh tablet a ni. PACS computerized-te hian ERP (Enterprise Resource Planning) software kaltlangin hna an thawk tawh dawn a ni.
Thawhtannia heng hmanrua sem hmanpuitu Cooperation minister chuan, society-te hmasawn zelna atan chief minister pawmpui angin sawrkar laipui Ministry of Cooperation-ah Mizoram Cooperative Policy an duan chu an thehlut a. Cooperative society-ten sawrkar atangin a tlem berah cheng nuai khat tal puihna an dawn theihna tur scheme a ni, tiin, he dilna hi a hlawhtling a nih chuan Mizorama cooperative society-te tan a tangkai hle dawn tih a sawi a ni.
Cooperative society-te chu ram hmasawnna atana pawimawh tak an ni, tiin, khawvel hmasawn zelin a ken tel digitization lama hma an sawnna tur kailawn pawimawh tak a nih avangin an hardware dawn chu tangkai taka hmang turin a chah. Mizoram-in hmasawnna rahbi thar a chuankai theihna atana entawntlaka ke pen turin a fuih bawk.
Cooperation commissioner & secretary Udit Prakash Rai chuan, Mizoramah PACS 270 vel a awm mek a, computer an neih vek theihnan atan thawh a inhuam tih a sawi.