Mizoram hmun hrang hrangah MNF-in Martarte Ni an hmang
Mizoram hmun hrang hrangah
MNF-in Martarte Ni an hmang
MNF party chuan kumtin September 20-a a hman thin Martar-te Ni chu kuminah September 21 – Thawhtanni ah Mizoram hmun hrang hrangah a hmang a. MNF Gen. Hqrs. hruaitute chu insem darhin an hmanpui theuh a ni.
Serchhip-a hmanpuitu MNF working president Tawnluia chuan, Aizawl Luangmuala Mizo Hnam Martar Thlanmualah MNF hnam sipai, zalenna suala martar-te chauh dah an ni loa, MNF pian hmaa British dotu Mizo hnam pasalthate hming pawh dah vek a ni a, Hnam Martar Thlanmual dik tak a ni tih a sawi.
“Kan chief minister-in Law zirlaite hmaah MNF leh Home ministry inremna chauh a ni. MNF hi Mizoram aiawh a ni lo, a ropui chiam lo e, a ti duh a. Inremna pawh teitet a tum lui ngar ngar a ni. ILP pawh sawrkar laipuiin an duh hun hunah an hlip thei, a ti duh a. Hetiang zawnga sawi duhtu CM ni mek, Serchhip bialtu MLA hian ‘dawih aw, tlanchhe aw’ a chhuah a ni,” a ti.
Tunhnaia MNF OB ruat tharte chuan tumahin candidate nih an tum loa, thalaite khawvel a ni tawh a, chuvangin MNF-in ram kaihruai a, hmasawnna kawng zawhpui turin Mizo nationalism-a chiang thalai a tam thei ang ber an candidate dawn tih a sawi.
Lungleia hmanpuitu MNF senior vice president Dr R Lalthangliana MLA chuan, zalenna suala beih kum 60-na an hmang mek a. Hnam sipaite khan kum 20 chhung Mizoram chhung leh pawnah thisen tam tak luangin ram tan an bei a, thangtharten kan hlut thiam a tul hle tih a sawi.
“Tunah hian Mizo thalaiteah nationalism-a harh thar lehna a thleng mek a. Chief minister Pu Lalduhoma hian kan hnam movement kha nasa takin sawihnawm tum thin mah se, mithiam tak tak, India ram chhung leh pawn amite pawhin an hlut hle a, min hlutsak tulh tulh zawk a ni,” a ti. Mizoram leh hnam, kan sakhua leh hnamzia vawnhim tlat a, Zohnahthlak khawvel hmun hrang hranga thendarha chengte rorelna pakhat hnuaia awm tir leh chu MNF thil tum lian ber a ni tih a sawi bawk.
Serchhip West Block MNF Thenzawl chuan Martar Day pual hian Thawhtanni zing khan hnatlangin, Mizorama tuikhawhthla sang ber Vantawng khawthla panna peng bula vantlang tana chawlh hahdamna hmun sak leh MNF lungphunna hmuna vantlang inthiarna hmunhma hnim leh bawlhhlawh an tifai. Serchhip West Block MNF president Liantluanga Renthlei kaihhruaiin Martar-te Ni pual hun hman zui niin, Ex. MNA Thenzawl president F Rohmingthanga sawi danin, Thenzawl atang hian ram leh hnam tana nunna hlantu mi 6 an awm.