Mizoram hmunphiah thawnchhuak

Mizoram hmunphiah thawnchhuak
Mizoram sawrkarin empanelled firm 7 a neih zing ami King Industries chuan hmunphiah an leikhawm sa chu tum nga state pawn lamah tunhnaiah an thawnchhuak tawh a, hmunphiah hralh leh zawrh atana sawngbawl lehnaah Reliance company nen an thawkdun mek.
King Industries chief executive officer Laldinliana sawi danin, kum 2021 atang khan Mizorama hmunphiah thar hi an supply tan a, hemi kum hian grade ‘A’ chu kg.ah Rs. 115 in an lei a, kum 2022-ah chuan kg. ah Rs 140-in an lei tawh. Hetihlai vek hian Gala Brush chuan Meghalaya hmunphiah chu kg.ah Rs. 80 in an lei a, mah se, Mizoram hmunphiah a tha zawk tih an hriat avangin a man pawh an pe sang ngam a. Gala Brush hian Mumbai leh Gujarat-a hmunphiah an siam chu India ram hmun hrang hrangah an thawn a, India ram pawnah pawh an thawnchhuak a ni.
Kum 2024 khan hmunphiah hi kg nuai 3 vel an lei a, a sawngbawl ngai zawng zawng Vai kuta awm thin chu Mizo thalaite a tih dan zirtirin, Mizoten an khawih ve tan ta tih King Industries CEO hian a sawi.
Reliance company nen hian 2024 tawp lamah an indawr tan a. Reliance hian Mizoram hmunphiah thar hi an lo hmelhriat loa, ‘Silchar broom’ tiin an lo hriat dan a ni tih a sawi. 2024 March thla tir khan Reliance office Mumbai-ah Mizoram hmunphiah sample kengin an sawiho a. March-ah tho hian Reliance hotuten Saipuma an kudam, hmun 5 ami leh hmunphiah chingtuho hmunphiah huan an rawn tlawh a, an lung a awi hle tih Laldinliana hian a sawi a ni.
King Industries hian tuna hmunphiah thar hnu ah vawi 5 – Howrah (West Bengal) ah vawi hnih, Patna-ah vawi hnih leh Guwahati-ah vawi khat a hlawmin an thawnchhuak tawh a ni.
January 17 khan a hnuhnung ber hi thawnchhuakin, a vailiamtu chief minister Lalduhoma chuan King Industries-in ram tana thahnem a ngaihna fakawm a tih thu a sawi a. Hmunphiah chu sawrkarin thlai lei tur a tih zinga a telh angin a takin an bawhzui a, a hlawhtlinna hmel pawh kan hmu chho zel tih a sawi.
“Hmunphiah bika agerement kan siampui mi 7 hian sawrkar facility an hman kan phalsak dawn a. An ni bakah hian midang lei duh an awm pawhin sawrkar chuan a phal vek a, inelna thianghlim tak awm se kan duh,” a ti.