Mizoram kuhva rah leituten Assam lamah harsatna tawk

Mizoram khawthlang lama thar kuhva rah leituten Assam lamah mi tu tih an hriat loh te atangin harsatna an tawk tih sawi a ni a, sawrkarin ngaihtuahpui turin an ngen tih an sawi.
Zamuang Arecanut Grower’s Cooperative Society Ltd (ZAGCOS) sawi danin, Zamuang khua hian kuhva huan siam hi eizawnna pui berah an hmang a, tlang ram lo neih an bansan tawh. Tunah hian kuhva huan siama ei zawng chhungkaw 300 vel an ni a. Kuminah chhungkaw 50-in kuhva huan an siam thar leh mek. Kum 2023 chhunga Zamuang kuhva chingtuten kuhva an hralh zat an lakkhawm chu Rs. 6,75,40,000 a ni.
An kuhva leitu Vai mahajon-ten Mitdellui kaltlangin Assam-ah an kalpui thin a. Mah se, mi tu tih hriat lohten Assam chhungah harsatna an lo siam thin avangin kuhva chingtuten nasa takin an tuar a, an kuhva pawh duh angin an hralh to thei lo tih an sawi a ni.
‘Kumin hian tuna kuhva kan hralh dan aia tha leh hlawk zawk min ngaihtuah sak a, a kalkawnga harsatna awm theite min chinfel sak turin thuneitute kan ngen a. Kuhva hi enkawl ngai tak a nih avangin kumtina rah tha tur chuan leitha hmanga enkawl an ngai a, chuvangin sawrkarin lei tha (fertilizer) subsidy-a kan lei ve theih nan a ranglama hma min laksak turin kan ngen a ni,’ a ti.