Mizoram leh Arunachal state nih cham Raj Bhavan-ah lawm
Mizoram leh Arunachal state
nih cham Raj Bhavan-ah lawm
‘Ek Bharat Shreshtha Bharat’ hmalakna hnuaiah Mizoram larsap Gen Vijay Kumar Singh (Retd) hoin Ningani khan Mizoram leh Arunachal Pradesh-te state puitlinga hlankai an nihna, ‘Foundation Day’ chu Raj Bhavan-ah lawm a ni.
Larsap chuan state pahnih chu state nuam leh mawi, tribal hnam hrang hrang leh tih dan phung hrang hrang neite inrem taka khawsakhona a ni, tiin, hnam bil sawi loa state anga hmasawn tlanna tur ngaihpawimawh a tul tih a sawi. Hnam ziarang leh tihdan phung chu min phuarkhawmtu, kaihruaitu leh nihna tichiangtu a nih avangin ngaihlua vawnghim zel turin a chah.
Ek Bharat Shreshtha Bharat chuan India rama hnam hrang hrang, tawng, ei leh bar, incheina leh nunphung thlenga danglamte inkara inpumkhatna siam a tum tih larsap hian sawiin, “Kan danglamna hi min thendarhtu tur ni loin min phuarkhawmtu tur zawk a ni a, hei hian inhriatthiam tawnna min pek bakah ram anga hmasawnna kawng kan zawhnaah pawh hmalam min panpui a ni,” a ti.
Mizoram Christian College principal Dr Tawnenga leh Mizoram University-a thawk Camdir Tabia Tegi ten Mizoram leh Arunachal Pradesh state chanchin an sawi a. Regional Institute of Paramedical and Nursing Sciences (RIPANS) zirlaiten Mizo leh Arunachal hnam lam an entir.
Northeast Areas (Reorganisation) Act 1971 hnuaiah kum 1972 khan Mizoram chu union territory (UT) a puan a ni a. India danpui siamthat vawi 53-na, 1986 hnuah India ram state 23-na tura hlankai a ni.
Arunachal Pradesh hi North-East Frontier Agency (NEFA) tih niin, kum 1972 khan NEFA chu UT-a hlankai a ni. 1987 February 20 khan India danpui siamthat vawi 55-na, 1986 hnuah India ram state 24-na a ni.
Ek Bharat Shreshtha Bharat programme hian India rama state leh UT-a cheng hnam hrang hrang, hnam ziarang leh nunphung inang lo tak tak inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT-te din champha – Foundation Day chu Raj Bhavan-ah larsap kaihhruaiin June 2023 atang khan hman thin a ni.