Mizoram MP pahnih lo hmuak
Mizoram MP pahnih lo hmuak
Parliament Session neih zawh taka Manipur-a Zohnahthlakte thlavang na taka an hauh avangin Mizoram MP pahnih lo haw chu MNF party chuan Lengpui Airport-ah an lo hmuak.
Mizoram MP pahnihte chuan Manipur thil thlengah chief minister Pu Zoramthanga’n a tawp thlenga NDA do tura a hrilh avangin an ni tan do loh emaw tan vak loh hleihtheih pawh a ni lo tih an sawi.
Lok Sabha MP C Lalrosanga chuan Lok Sabha lamah chuan Manipur thil thleng hi sawrkar lai lamin sawichhuah leh sawiho an hlau hle a; thusawi an dil ve pawh hmarchhak MP ho hrim hrim chu, Manipur MP pawh telin thusawina hun pek an ni lo tih a sawi.
Manipur Zofate thlavang hauhna’n Mizoram mipuiin an thlawp avangin huaisen takin an awm a, an tih theih china an tih tur chu Mizoram tan an ti zel dawn tih a sawi. Sawrkar rin tawk lohna motion chu Congress member putluh a ni a, Congress an tan leh thlawp vang ni loin, Manipur Zofate an thlawp vangin an motion putluh hi an lo thlawp mai chauh tih C Lalrosanga hian a sawi a. NDA member zingah motion thlawp ve tu dang an awm loh thua zawhna chhangin, vote an thlakna lam hretu NDA member zingah, a hma zawnga amah be lumlam ve thin ho pawhin ‘an hmelhriat loh kalpelh’ ngawk ngawk tawh nia sawiin, “Chuti khawp chuan he boruak hian min tuam hneh hlawm a ni,” a ti.
Rajya Sabha member K Vanlalvena chuan Manipur issue hi thil thleng satliah niloin, tum lawk sa veka thil thleng nia an hriat avangin na takin an do tih a sawi a. Session neih chhungin mi 58-in thusawi dilna an thehlut a, Manipur thil thleng lam vek niin, sawrkar tan lam leh tan lo lam an ni a; sawrkar tan lam atanga thusawi phalsakna hun pek tum a ni chu duh loin chairman hoa an meeting-na atangin a chhuak tau a, House chhungah pawh ruling lama thu in, ruling an do si tih a sawi.
A thusawi ve ni khan, a thutna atanga chhuakin chairman chu thusawi a dil a, a thutnaa thu tura tih a ni a, thusawi tura koh a nih loh avangin a chhuak nawn leh tih a sawi. Chairman-in thusawi tura a koh hnu ah a thusawi avangin sound tihtawp sak nghal a ni a, a thusawi zaa 40 vel bak a lang hman lo tih a sawi.
“Khami ni khan ka tribal nihna kha a thawk tlat a, kan thin a rim a, min chotu kha awm se ka ti ngawih ngawih mai a ni,” tiin, tribal-te hnuaichhiah tumna nia lang chuan a thinlung a tih nat thu K Vanlalvena hian a sawi a ni.
House pahnihah hian Uniform Civil Code Bill pawmpui tura dilna a lut lo hrim hrim tih Rajya Sabha MP hian a sawi a. Rajasthan MP pakhatin UCC sawiho dilna erawh a thehlut chauh tih a sawi. Forest Conservation Amendment Bill erawh ruling leh oppostion lamah a hriat theih chinah a duh lohna aupui an awm lo tih a sawi a. A bikin, China epna atana tul an ti nia a lan thu a sawi. A ni erawh chuan ramngaw humhalh leh ram lak dawn pawha Forest phalna lak zel chu a duhdan a nih avangin a thlawp lo tih a sawi a ni.
Thuthar thehdarhtute zawhna chhangin, MLA inthlan turah Aizawl South-I a ding tura tih a nih thu K Vanlalvena hian a sawi a. A tling a nih pawhin MP nge MLA zawk a thlan ang tih chu an party hruaitute thu thu a ni ang, tih a sawi.