Mizoram NGO-ten Manipur buainaah Inremna siampui turin Union HM ngen

Mizoram NGO-ten Manipur buainaah
Inremna siampui turin Union HM ngen
NGO Coordination Committee Mizoram chuan Manipur buainaah hnam hrang hrangte pawm tlan theih tur inremna siampui thuai turin Union Home minister Amit Shah an ngen.
Manipur buaina chungchangah NGO Coordination Committee hruaitute hian May 15 chawhnu khan Union Home minister hi New Delhi-a a office ah hmu memorandum an thehlut a. He buaina hi a reh thuai theihna’n hma la tur leh buaina tuartute chhawmdawl hna chak taka thawk turin an ngen. Zohnahthlak unauten an tawrh nasat zia leh mahni inlum pawh luah ngam loa Mizoram leh hmun hrang hranga an raltlan thu te, Mizote thinlung nat ziate an thlen. He buaina avanga zirna bahlah zawng zawng, a bikin Mizoram atanga Manipura lehkhazir ten tha tak leh boruak muanawm tak hnuaiah an zirlai an chhunzawm thuai theihna’n rang taka hma lak a ngaih thu an thlen a. Buaina a reh theihna’n Manipur chhunga hnam hrang hrangten an pawm tlan theih tur inremna siam thuai tura ngenin, buaina hian North East hmun hrang hrangah hlet thalo a hrin chhuah belh lohna’n ngaihtuahna seng tur leh boruak thlir reng turin an ngen bawk.
Union Home minister chuan Manipur buaina hi a mawhphurhna a nih thu leh an enzui reng thu sawiin, tun atanga ni reiloteah boruak muanawm a thlen leh thuai a beisei thu NGO Coordination Committee hruaitute hi a lo hrilh a, ei leh in mamawh te pawh a luh mek zel thu a sawi a ni. Amit Shah hi Union Home secretary, joint secretary (NE) leh Intelligence Bureau director ten an tawiawm.
Mizoram NGO hruaitute hian Union Law minister Kiren Rijiju chu a chenna inah an hmu bawk a. Manipur buaina irh chhuah chhan nia lang, Manipur High Court order leh Supreme Court inrawlh dan chungchang an sawipui. Kiren Rijiju chuan special status chungchang hi High Court thuneihna a nih loh thu sawiin, North East MP Forum ten boruak muanawm a thlen leh thuai theihna’n theihtawp an chhuah thu NGO Coordination Committee hruaitute a hrilh a ni.
Indian National Congress hruaitu Rahul Gandhi chu a chenna inah hmu in, Manipur buaina chungchang an sawipui a. Ama level-ah a theih ang anga he buaina a reh theih na’na hma la tur leh en zui reng turin an ngen. Rahul Gandhi chuan Manipur buaina chu a lo hriat tawh thu leh a tul anga a lo en zui ve reng tur thu a sawi a. NGO Coordination Committee hian Rahul Gandhi hnenah hian memorandum an thehlut a ni.
NGO Coordination Committee hruaitute hian centre dawra Delhi an cham chhungin Meghalaya chief minister Conrad Sangma, Nagaland MP-te bakah mi pawimawh dangte an hmu a. Delhi-a pawl hrang hrang aiawhten an thlenna Mizoram House-ah an lo hmu bawk. Central YMA vice president Lalhmachhuana’n a ho a, a ni bakah hian CYMA fin. secretary Roneihthanga, MUP vice president Lalbiakmawia Khiangte, MHIP president Ngurmawii Sailo, MZP general secretary Jacob Lalmuanpuia leh MSU vice president Laldinsanga te an ni. Delhi-a an mi hmuh duhte an hmuh theihna tura Mizoram sawrkar, Mizoram MP pahnih bakah Mizorama political party hruaitute leh mimal thahnemngai engemawzatin an puihnaah lawmthu an sawi a ni.