Mizoram Official Taekwondo Championship

Mizoram Official Taekwondo Championship
Mizorama taekwondo inelna sang ber nimina zawh fel tak Mizoram Official Taekwondo Championship vawi 26-na leh Mizoram Poomsae Championship vawi 17-naah Aizawl Taekwondo Academy an chungnung leh.
SAI, Mission Vengthlanga khelhah Aizawl Taekwondo Academy, Electric Veng hi hneh takin an champion nawn.
Overall team champion Aizawl Taekwondo Academy, Electric Veng hi a zawnin kum 4 teh meuh an champion-na a ni ta a; tuntum hian point 2831 hmuin an fal hle a, anmahni hnaihbertu Republic Vengthlang Taekwondo Club chuan point 1719 an rut ve bawk.
Team khel tha dang Armed Veng South Taekwondo Club chu Best Fighting Spirit Team-a thlan niin, Armed Veng Taekwondo Academy chu Most Promising Team Trophy hlan an ni a; Taekwondo Academy of Best Friend team chuan Best Discipline Trophy an dawng thung.
Ni li chhunga Kyorugi (fighting) inelna bikah Aizawl Taekwondo Academy an champion a, point 2211 hmuin an sang leh ber.
Republic Vengthlang Taekwondo Club chu pahnihna niin point 1027 an hmu a; Gidae Taekwondo Club chu point 919 hmuin pathumna an ni.
Poomsae (form) inelna huangah Republic Vengthlang Taekwondo Club chuan point 692 hmuin pakhatna an ni a; champion ngun ber Exodus School chu point 690 hmuin pahnihna an ni ve thung.
Point 620 hmutu Aizawl Taekwondo Academy-te’n pathumna dinhmun an luah ve bawk.
Ngaihhlut hlawh tak Champion of Champions inelna, category hrang hrang champion theuhin an inchuh 2024 Title Fight-ah champion lai Vanlalmawipuia Hnamte, Taekwondo Club, Venghnuai chuan a title humhimin a vawingana’n a champion leh.
Hmeichhe lamah R. Lalbiaknuami, Chaltlang Veng chuan a tumpui zawng zawng hnehin a vawikhatna’n a champion ve bawk.
He championship-ah hian Robert Muanthansanga (ATA) leh Laltlansang (SAI Aizawl)-te chu Kyorugi Best Fighter atan thlan an ni.
Republic Venthlang Club aiawh ve ve Mason Lalmuanzuala leh April Lallianmawiite chu Poomsae khel thiam ber atan thlan an ni bawk.
Player naupang ber, kum 3 leh thla 1 mi Esther N. Lallawmzuali d/o Lalnunzuala, Lawngtlai hnenah lawmman pek a ni bawk.
Champonship kharna hi MATA president Prof. Rualkhuma’n a kaihruai a; khuallian minister B. Lalchhanzoa’n fuihna thu sawiin, khualzahawm SAI Regional Director Lianhmingthanga leh MATA senior vice president Master VL Sawmate’n thu an sawi.
Championship report hi MATA general secretary Master Joseph Thansanga’n pein, MATA vice president CH Vanhmingthanga’n lawmthu a sawi a; WCD Dy. Director R. Lalmuankimi’n kharna hun hi a hmanpui bawk.
He championship-ah district pasarih atanga team 35 atangin player 390 an inlan.