Mizoram ralmuan thu hi State dangin an hriatpui – Dr VK Paul

Mizoram ralmuan thu hi State dangin an hriatpui
– Dr VK Paul
Mizoram chu state ralmuang tak a ni tih state dangin an hriatpui thu Niti Ayog member Dr VK Paul chuan a sawi.
New Delhi-a cham mek chief minister Lalduhoma chuan Thawhtanni khan Niti Ayog member kal chhuak tur Dr VK Paul hi Mizoram House-ah a kawm a. Dr VK Paul chuan a hun chhunga Mizoram sawrkar nen tha taka an thawh dun avangin lawmthu a sawi a. Chief minister hmalakna hrang hrang fakin, Niti Aayog nen thawdunna tha tak an nei thei chu lawmawm a tih thu a hrilh. Mizoram chu state ralmuang tak a nih thu state dangten an hriatpui tih a sawi bawk.
Chief minister chuan Niti Aayog-in Mizoram a duhsaknaah lawmthu sawiin, sawhthing chungchanga hma an lakna chu an chhawr mek tih a sawi. “Ginger Capital of India-ah min puang khan rah tha a chhuah chho zel a ni,” a ti.
Mizoram chu ziak leh chhiar thiam vekna state hmasa ber a nih thu, eirukna leh hlemhletna laka state fihlim ber a nih thu, khualzin hip kawngah hma a sawn nasat thu leh India rama state ralmuang ber a nih mek thu hrilhin, tunhnaiah silai keng pawl awmchhun pawh remna an siampui leh tawh tih a hrilh.
Inkawmnaah hian Tourism minister Lalnghinglova Hmar pawh telin Niti Aayog leh Mizoram sawrkarin Tourism Conclave buatsaih an tum dan an thlirho a. May thla chawhnu lamah Delhi-ah pre-conclave meeting neih an rel bakah Tourism Conclave-a Niti Aayog hmalakna official lamin an hrilhfiah a ni.
Niti Aayog hian Mizoram tourism policy changtlung zawk duan dan tur, Mizoram puala Institute of Hotel Management-Ashok (IHM-A) hnuaia a thlawna training neih theih dan leh investor koh luh chungchang chief minister leh Tourism minister hi an sawipui bawk.