Mizoram sorkarah ‘Cancel’ a lar

Tun hnaiah Mizoram sorkarah thil tih tawh hnu hnuhkir a awm a awm mai a, ‘cancel/withdrawn’ tih chuanna thuziak, sorkar thu hmuh tur a awm fo mai.
Cancel hnuhnun ber chu June ni 2-a mi, sorkar quarters sak contract hna, sorkarin a cancel leh tak kha a ni awm e.
Aizawl Police Station-a Type II quarters paruk sakna tur, a estimated cost Rs 3,00,86,416.00 te, Kulikawn Police Station-a Type I quarters paruk sakna tur Rs 3,00,47,800.00 leh Kulikawn Police Station veka mi tur, Type III quarters pali sakna tur Rs 2,27,32,512.00 te atana tender chhuah vek tawhte chu June ni 2 khan PWD-in cancel a nih thu an chhuah.
Heng hnate atana tender chhuah chungchangah hian PIL thehlut an awm a, May ni 20 khan Gauhati High Court, Aizawl Bench chuan thutlukna lailawh (interim order) chhuahin lo tawp rih turin Mizoram sorkar a hriattir a ni.
Heng hna chungchanga PIL thehluttu hian tender chhuah dan chungchangah thil dik lo a awm tiin a khing a, ‘10% below’-a chhan awih loh tia tender chhuah a ni hi a dik lo tiin a khing a ni.
A hma ni, June ni 1-ah khan hna lak tur atana advertisement chhuah vek tawh chu cancel a ni a, dilna lo thehlut tawhte tan an pawisa chawi lak let theih tih a ni.
He hna hi law & judicial department hnuaia Junior Grade of Mizoram Legal Service (Legal Officer) post a ni a, MPSC lak tur a ni. Mahse, Law & judicial department-in withdraw tura an ngen avangin advertisement lo chhuah tawh chu cancel a ni ta a ni.
May ni 25-ah khan Mizoram State University atana hna hrang hrang lo siam tawhte cancel a ni bawk.
Mizoram State University din tur atan hian Mizoram sorkarin hna 59 a siam a, hemi atan hian May ni 4 khan hriattirna (notification) pawh chhuah a ni nghe nghe. Mahse a vai hian cancel leh vek a ni.
Hemi atana higher & technical education department hnuaia post 59 siam hi, a chhuah tirhah mak tih a hlawh nghal a, cancel leh ngei ngei tura ngaih sa a ni.