Mizoram thlai tharchhuahte hi….

Tun hnaia Ropuiliani Women Farmer Producer Company Limited hmalakna thlir honaah, he company-in Mizoram hmun hrang hranga sawhthing leh hmarcha a leikhawm sawngbawl zui a nih dan tarlan a ni a. Sawhthing zailep tih ro leh hmarcha dip siam chhuah a nih dan te, Mizoram pawna buyers hrang hrangte nen indawrna kalpui mek a nih dante tarlan a ni bawk a.
Kan state chhunga thlai tharchhuah, keimahni ngeiin kan sawngbawl a, kan state chhunga hralh tur leh state danga thawn chhuah theih tura buaipui a ni ve ta hi thil lawmawm tak a ni. Tunhma chuan state dangte tihturah kan dah a. Tunah chuan mawi tak taka funin, a siamchhuaktu state Mizoram hming a chuang kalh tawh a. Mahni state tharchhuah ngei mai, mawi taka fun hi lei pawh a phurawm a, ei pawh a chakawm a, a thianghlim dan (organic) lah hriatchian sa, ngaihtha taka ei theih a ni lehnghal. State pawn lamah, tun aia tam tham zawk thawn chhuak ur ur thei khawpa tan kan lak sauh sauh a pawimawh hle a ni.
Farmer Producer Company ang hi kan inzar pharh a pawimawh dawn hle. Tun dinhmunah, central sector scheme hnuaia FPO in registered hi Mizoram atangin 14 zet an awm ve ta a; kum 2021 atang khan kan harh thar ve tan niin a lang a, awmze nei zawkin Mizoram thlai tharchhuahte hi kan thehthang ve thei tan niin a lang a, a lawmawm hle. Hmasawnna tur erawh a la tam.
State dang atangin, hnam dang ten Mizoram tharchhuah hmarcha, sawhthing, serthlum, lakhuihthei etc. an rawn zawng a, a hmunah an rawn lei ngam. A phurh man leh labour tha nen, hmun hla tak atanga rawn kal vang vang chung pawha hlep an la nei thei a nih chuan, kan thlai tharchhuahte hi keimahni ngeiin a hmunah, senso hautak lutuk lovin, kan siam chhuakin kan hlawkpui ve tur a ni, tih ngaihdan hi kan kalpui a hun ve tawh a ni.
Chumi chuan eng nge a hrin chhuah ang? kan tih chuan, kuthnathawh hlawkzia leh thatzia a takin a lo lang ang a, ‘kuthnathawh i zahpui lovang u’ tia infuih vel a ngai tawh lovang. Khawvel mihringte hi kuthnathawktute chawmhlawma nung mek kan ni a, chuvangin ram changkang apiangin kuthnathawh an dah sang a, an chawikang a, an thatpui mek a nih hi.
Kan sawrkar pawh hian, kuthnathawktute hmasawnna tur hi hna pui bera a neih thiam hunah, kan state economy pawh hi a tha chho ve mai ang. Election oriented ang deuh rohva kuthnathawktute kan enkawl chhung chuan, changkan ni kan nei ngai lovang. Kan tharchhuah thlai leh theite hi hnamdangin an hlawkpui theih chuan, a tharchhuaktu berte hian chu hlawkna chu tel i tum ve tlat ang u.