Mizoram U 15 an chak lo

On Jul 30, 2024 25 0

Chhattisgarh a khelh mek Junior Boys’ National Football Championship for the BC Roy Trophy 2024-25-ah Mizoram Junior team te chuan thawhtanni khan Odisha an hmachhawn. Mizoram hi an match hmasa berah Odisha lakah 3-2 in an tlawm a, champion lai Uttar Pradesh an hmachhawn zui leh ang.
Mizoram hian Odisha lakah bul an tan tha lova, chawlhlawk hmain goal thum ngawt an chhuah hman. Heng an goal chhuah zawng zawngte hi vanduai vang a ni a, siamthat theih thil a nihna lai a awm bawk. Chawlhlawk hnu lamah huaisen taka an khingpuite bei letiin goal hnih thun bawk mah se, uiawm takin tlawm an pumpelh thei ta chuang lo a ni.
Mizoram tan hian Vansangpuia Ralte leh Fracis Lalhruaizela ten goal an thun a, an goal thun pakhat pawm a ni lo bawk nen tlawm an pumpelh thei lo va, round sang zawk lut turin Mizoram tan beisei tur a awm lo zui nghal bawk. Mizoram hnehtu Odisha hi inelna neih mekah an khel tha zawn hle a, hnehna an chang zawn. An match hmasa berah Inrinni khan champion lai Uttar Pradesh an hmachhawn a, inlehthalna lian thlentirin 3-1 ngawt an chak. Champion lai an hneh hnuah Mizoram an hneh zui leh vangin knock-out round an lut chiang nghal.
Uttar Pradesh an hmachhawn tum hian Montu Nag chuan minute rukna lekah hmahruaina goal a thun. Champion lai Uttar Pradesh tan Shivam Yadav chuan minute 21-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Odisha an khel tha chhunzawm a, goal hnih an thun belh zui leh. Sambhunath Majhi chuan minute 64-naah hma an hruai nawn lehna goal a thun. Hun rei tak chhung goal a luh belh theih loh hnuin Viky Majhi chuan minute 90+1-ah Odisha chakna nem nghet turin an goal thumna a thun a, champion lai lakah 3-1 a hnehna changin point thum hlu tak an hmu.
Champion lai Uttar Pradesh an hneh hnua Mizoram hneh lehtu Odisha hian khelh hnih atanga point ruk hmuin, goal ruk an thun a, goal thum an chhuah. Group A-ah hian team thum, Uttar Pradesh, Odisha leh Mizoram an awm a, vawi hnih chak zawn Odisha an tlang a, Mizoram leh UP an inkhel zui ve leh ang.