Mizorama bungraw lakluhna kawng – Run lei bomb chhia

Myanmar atanga Mizoramin bungrua leh ei leh in tur a lakluhna kawngpui ber, Teddim to Zokhawthar inkara lei pawimawh, Run lei chu tunhnai khan bomb nia hriat hmanga tihchhiat a ni.Thudawn danin he lei hi June 8 khan tihchhiat a ni a, hei vang hian Myanmar atangin Mizoram lamah bungrua a lut mumal thei lo. Tahan atanga Teddim kaltlanga Myanmar bungrua, Mizorama lut thin chu a tawp rih vek tih sawi a ni.
He lei hi Run lui kaina a ni a, feet 20 vela zau, feet 300 vela thui, suspension bridge a ni. June 8 – Inrinni zingkar khan tihchhiat a ni a, lirthei tan kal ngaihna a awm rih lo.
Hetihlai hian Tahan leh Falam inkar, Run lei (Var lei tia sawi bawk) chu lirthei leh kea kal ten an la zawh thei a, a kawng a thui zawk naa, Falam atang hian Mizorama Zokhawthar lamah Myanmar atanga bungraw kal hi a la rawn luhpui theih tura beisei a ni tih sawi a ni.
Tunhnaiah Myanmar sawrkar, State Administration Council (SAC) Airforce chuan mipui sipai lam hi jet fighter hmangin bomb-in a bei nasa hle nia sawi a ni a. Run lei pawh hi an chetna pakhat nia ngaih a ni.
(Thu leh thlalak lakna: Maipawl.org)