Mizorama Hindi tih hmasawn theih dan turah rawtna thlen

National Language Advisory Board member Dr. Kathy Rohlupuii chuan Mizoram-a Hindi tih lar a, hman uar a nih theihna atana tul nia a hriat rawtna a thlen.
Ningani khan National Language Advisory Board hi Union minister of Rural Development Shivraj Singh Chauhan hoin Delhi-ah an thukhawm a. India hmarchhaka he Board member awmchhun, Govt Aizawl College assistant professor Dr Kathy Rohlupuii a tel.
Thutkhawma Mizoram mamawh a thlen zingah – Mizoram school-a higher secondary leh primary school-ah CSS emaw RMSA emawa Hindi zirtirtu la turin a ngen a, chu chu Mizorama Hindi than zelna atan a pawimawh tih a sawi. Mizoramin Hindi-a hma a sawn theihnan Hindi subject-a MA chin chunglam zirlaite hnena cash award pek emaw sumfaia intanpui emawa tih theih dan ngaihtuahpui se a duh tih a sawi a. World Hindi Conference Mizorama neih a, mipui hipkhawm thei tur India rama milarte chah chhuah a rawt bawk.
Heng bakah hian Hindi subject-a Ph.D ti tur tan University Grants Commission-in NET qualified kher a tih chu, Mizoram tana ennawn leh tura ngenna a thlen a. Union RD minister hian Mizorama Hindi hmasawnna tura mamawh thlen hi an ngaipawimawh a, an chhinchhiah vek tih a sawi a ni.