Mizorama leimin leh lirnghing thlen thin dan zirchiang dawn

Mizorama khuarel chhiatna thleng, a bikin leimin leh lirnghing chungchang zirchian tuma cham mek Amrita Vishwa Vidyapeetam University (Amrita University) hotute chu Disaster Management & Rehabilitation minister Prof. Lalnilawma chuan Thawhlehni khan a kawm a. An cham chhunga zirchianna an kalpui dan tur ruahmanna thlirho a ni.
DM&R minister chuan Amrita University zirchianna atangin sawrkar leh mipuiin hlawkna nasa tak an chhar ngei a beisei tih a sawi a. Mizoram chu khuarel chhiatna hrang hrang – leimin, lirnghing leh a dangte thlen duh bikna leilunga awm a nih avangin, chumi lam kaihhnawih inzirtirna leh data rintlak tak neih chu tih makmawh a ni tih a sawi. Chumi atan chuan Amrita University-a mithiamte chu thawhpui tha tak an nih ngei a beisei tih a sawi a ni.
Amrita University hotute hi Mizorama khuarel chhiatna, a bikin lirnghing leh leimin zirin, inven dan leh chhiatna leh a nghawng tih ziaawmna atana hmalak dan tur zirchiangin March 9-16 chhung Mizoramah an cham dawn a. An cham chhung hian Aizawl khaw chhunga lung tlak /lei tawlh duhna hmun (rockfall zones) bakah district dang – Saitual, Khawzawl, Lawngtlai leh Mamit-a chhiatna thlen thinna hmun tlawhin an zirchiang dawn a ni.