Mizoramah ASF a awm rih lo

On Feb 13, 2025 6 0

Kum hmasa lamah Mizoramah African Swine Fever (ASF) a leng a, kum tawp lamah erawh a zia. A zia deuh deuh a, tunah chuan Mizoramah ASF a awm lo tia sawi theih a ni ta.
AH&Vety department hotute’n Mizoramah ASF a awm rih lo tia sawi theih a nih thu an sawi a, ASF hrileng hi a tawp rih a, thunun (control) a ni mek tiin an sawi.
December ni 23, 2024 Khan Kolasib district-a Saipum-ah ASF vangin vawk a thi a, hei hi Mizorama ASF vanga vawk thih hnuhnun ber ni a ni rih.
Tun hnai ni 50 chhungin vanneihthlak takin ASF vanga vawk thi a awm lo a, Mizoram dinhmun enin AH&Vety department hotute chuan ASF hri leng hi thunun a ni rih a, hri a awm rih lo tihnaah an ngai.
An sawi danin, ASF vanga vawk thihna vawk in hi ni 50 hnuah vawk dang dah leh nan a him a, ni 50 hnuah chuan a hmaa vawkin a lo thihpui ASF hri kha a lo awm tawh lo. Chuvangin ni 50 hi an ngai pawimawh a ni. February ni 12 hi a ni 50-na a ni.
Aizawl district-ah phei chuan ASF vanga vawk a thih lohna hi ni 60 chuang daih a ni tawh a, Champhai district-ah chu ai chuan a rei. Kolasib district an hnuhnung ber a, chu pawh ni 50 a tling ta chiah. Kolasib tih lohah Lunglei district an hnuhnung.
AH&Vety department hotute chuan vawk thi endik hi chu a la awm reng a, mahse ASF a lo ni zel tih an sawi. Thlasik laiin ASF hrileng hi a zia ang tih chu rin dan sa a nih thu an sawi bawk.
ASF hi 2021-ah Mizoramah finfiah a ni a, hemi hnu hian he hri hian Mizoram hi kum tin a tibuai. Kum liam taah khan ASF vanga vawk thi hmasa ber chu February ni 9-a mi a ni.