Mizoramah BJP a la sawrkar dawn – Dr K Beichhua

BJP chu Mizoram mamawh engkim petu a nih avangin nakinah chuan an hnenah ngaihdam dilin, BJP anga dinchhuah ve kan duh thu kan la sawi anga, Mizoramah BJP a la sawrkar ngei dawn tih State BJP hruaitu Dr K Beichhua chuan a sawi.
Thawhtannia an party office-a inkhawmah BJP Mizoram president Dr K Beichhua hian, nakin lawkah Pathian zarah Mizoramah BJP a sawrkar ngei ngei dawn a, BJP ni lo thei lo dinhmunah kan la awm dawn tih a sawi. “A chhan chu, Mizoram hi mahni kea ding thei leh awm thei kan ni loa, intodelh lo tan a huaisen tak tak theih loh avangin, nakin lawkah chuan kan mamawh engkim min petute hnenah hian ngaihdam kan la dil anga, central hruaitute hnenah BJP angin kan lo ding chhuak ve tawh dawn, tiin kan la sawi dawn. Vawiina BJP-a kan lo awm hi kan tisual loa, Pathian zarah kan hmabak a eng zel dawn a, future bright ber kan ni,” a ti.
BJP member-ten politics-a an dinhmun a nghet hle tih an hriat a ngai tih a sawi a. Congress party chu central-a an tanhmun a phet mek a; party dang, regional party – MNF leh ZPM pawh an tanhmun a nghet tak tak thei loa, mahni kea ding thei an nih loh avangin an dinhmun hi a langah tha in lang mah se, an puipate rilru erawh a mangang hle thin tih a sawi.
BJP nihna dik tak Mizoram mipuiin kan hmu zel dawn tih Dr K Beichhua hian sawiin, “Development party kan nih angin, kan tum ber chu hmasawnna thlen a nih laiin, Congress party hruaitu thenkhatin ‘development policy’ sawi ve tur nei si loin, BJP chu ‘Hindu party’ tia beiin an buai laih laih a. Mizoram thalai tam tak leh nu leh paten BJP nih phung leh hmalakna a taka an hmuh leh an chan mek avangin, bum theih loh tam tak an awm tawh a, hei vang hian BJP hmalam hun a eng hle a ni,” a ti.